لە پشووی سەری ساڵ ڕۆژانە زیاتر حەوت هەزار گەشتیار هاتوونەتە هەولێر

ئاڤا نیوز 

 

پارێزگاری هەولێر ئاشكرای دەكات كە ئەمساڵ بەراورد بە ساڵانی ڕابردوو ژمارەیەكی زیاتر گەشتیار بۆ پشووی سەری ساڵ سەردانی شاری هەولێریان كردووە.

 

لێدوانی فەرمی: ئومێد خۆشناو، پارێزگاری هەولێر لە كۆنفڕانسێكی ڕۆژنامەوانیدا ڕایگەیاند: بەهۆی درێژیی ماوەی پشووی سەری ساڵ، ئەمساڵ ژمارەی ئەو گەشتیارانەی كە هاتوونەتە شاری هەولێر زیاتر بووە، ساڵانی ڕابردوو لە 25ی12ەوە هاتنی گەشتیاران دەستیپێدەكرد، ئەمساڵ لە 20ی مانگەوە ژمارەیەكی زۆر گەشتیار ڕوویان لە شاری هەولێر كرد.

 

لەلایەكی دیكەوە: بەپێی ئەو داتایانەی كە پارێزگای هەولێر تۆماری كردوون، لە 20ی12ەوە ڕۆژانە زیاتر حەوت هەزار گەشتیار لە باشوور و ناوەڕاستی عێراقەوە هاتوونەتە شاری هەولێر و لە دوای تەواوبوونی پشووی سەری ساڵ، پارێزگا ئاماری تەواوی گەشتیاران بڵاو دەكاتەوە.

 

ئەوەی پێویستە بیزانیت: بەپێی پێشبینییەكانی دەستەی گەشتوگوزاری هەرێمی كوردستان ئەمساڵ تەنیا بۆ پشووی سەری ساڵ، 200 هەزار گەشتیار لە باشوور و ناوەڕاستی عێراقەوە سەردانی شارەكانی هەرێمی كوردستان دەكەن.