لە دهۆک سێ هەزار پارچە زەوی بۆ دابەشکردن بەسەر فەرمانبەران ئامادە دەکرێن

ئاڤا نیوز

 

قۆناغێکی دیکەی دابەشکردنی زەوی لە دهۆک دەست پێدەکات، بەڕێوەبەرایەتیی گشتیی شارەوانییەکانی دهۆک ئامادەساز دەکات بۆ کوژاندنەوەی هەزاران پارچە زەوی بەمەبەستی دابەشکردنیان بەسەر فەرمانبەران لەماوەی دوو هەفتەی داهاتوودا.

 

وێنە گەورەکە: بەهۆی هەڵکەوتەی جوگرافی ناوچەکە تاوەکو ئێستا نەتوانراوە زەوی زیاتر لە پارێزگای دهۆک بۆ فەرمانبەران ئامادە بکرێت بەڵام پڕۆسەکە بەردەوامی هەیە، لە قۆناغی یەکەمی پڕۆسەی دابەشکردنی زەوی بەسەر فەرمانبەران و خانەنشینان نزیکەی دوو هەزار و 200 پارچە زەوی دابەشکراون، ئێستا کار لەسەر ئەوە دەکرێت زەوی لە دەرەوەی پارێزگاکە دابین بکرێت. 

 

لێدوانی فەرمی: دیار بەحری، بەڕێوەبەری گشتییی شارەوانییەکانی دهۆک بە ئاڤای گوت، "لە سنووری فایدە سێ هەزار پارچە زەوی لە قۆناغی کۆتایی کوژاندنەوەدان و لەماوەیەکی نزیکدا ئامادە دەبن، بەڵام دابەش ناکرێت تا ژمارەکە زیاتر دەبێت ئینجا دەست بە دابەشکردنیان دەکرێت."

 

ئەمەش بزانە: بڕیارە لە ئایندەیەکی نزیکدا قۆناغی دووەمی دابەشکردنی زەوی بەسەر فەرمانبەران و خانەنشینان دەست پێبکات و لە سنووری دهۆک هەشت بۆ 10 هەزار فەرمانبەر و خانەنشین سوودمەند دەبن.