سبەی 275 هەزار مووچەخۆر لەڕێگەی هەژماری من مووچە وەردەگرن

ئاڤا نیوز

 

سبەی تیمەکانی هەژماری من دەست بە دابەشکردنی مووچەی مانگی یەکی 275 هەزار فەرمانبەر و خانەنشیی بەشدار لە هەژماری من دەکەن.

 

وێنە گەورەکە: دوای 15 ڕۆژ کارکردنی بەردەوام و پێنج ڕۆژ مانەوە لە بەغدا و چەندین کۆبوونەوە، شاندی هەرێمی کوردستان، لەبارەی مووچە و شایستە داراییەکانی خەڵکی کوردستان ڕێککەوتنی لەگەڵ وەزارەتی دارایی عێراق ڕاگەیاند، بەمشێوەیە مووچەی 12 مانگی ئەمساڵ زامنکرا و بێ کێشە مووچەخۆران مووچەکانیان وەردەگرن.

 

ئەوەی پێشبینی دەکرێت:  تیمەکانی هەژماری من ئامادەکاری دەکات بۆ ئەوەی پارە لە ئامێرەکانی 'ئەی تی ئێم' لە سەرجەم شار و شارۆچکەکانی هەرێمی کوردستان دابنێت، سبەی پارەکە دادەنرێت و مووچەخۆران دەتوانن مووچەکەیان ڕابکێشن.

لێدوانی فەرمی: ڕێبین کامەران، بەڕێوەبەری پەیوەندییەكانی پڕۆژەی هەژماری من بە ئاڤای ڕاگەیاند، سبەی کاتژمێر هەشتی بەیانی پارە ئەخرێتە سەر 550 ئامێری ئەی تی ئێم.

ئەمەش بزانە: بەگوێرەی دوایین داتای تیمی هەژماری من، 720 هەزار فەرمانبەر خۆیان لە نێو پرۆسەکە تۆمارکردووە و 370 هەزاریان کارتیان وەرگرتۆتەوە.