دۆناڵد ترەمپ لە لێدوانێکی پەشیمان دەبێتەوە

ئاڤا نیوز

کۆشکی سپی ڕەتیدەکاتەوە سەرۆکی ئەمریکا پلانی ناردنی هێزی سەربازی و داگیرکردنی غەززەی هەبێت.

وێنە گەورەکە: دوای ئەوەی دۆناڵد ترەمپ، سەرۆکی ئەمریکا لەمیانی کۆنگرەیەکی ڕۆژنامەوانیدا لەگەڵ بنیامین نەتەنیاهۆ، سەرۆکوەزیرانی ئیسرائیل باسی پلانێکی ئەمریکای بۆ دەستبەسەرداگرتن و بەڕێوەبردنی کەرتی غەززەی لەلایەن واشنتنەوە کرد، ئەم لێدوانە ناڕەزایی و کاردانەوەی نێودەوڵەتی و ناوخۆیی لێکەوتەوە.

لێدوانی فەرمی: کارۆلین لیڤیت، وتەبێژی کۆشکی سپی، لە کۆنگرەیەکی ڕۆژنامەوانیدا ڕایگەیاند: سەرۆک ترەمپ پلانی ناردنی هێزی سەربازی و داگیرکردنی کەرتی غەززەی نیە و دەیەوێت ئەمریکا لە دووبارە بونیادنانەوەی غەززە بەشدار بێت.

وتەبێژی کۆشکی سپی وتیشی: ترەمپ مەبەستی چۆڵکردنی غەززە بەشێوەیەکی هەمیشەیی نەبووە و دانیشتوانی ئەو کەرتە دەتوانن دوای بونیادنانەوەی شارەکەیان بۆ ماڵ و شوێنی خۆیان بگەڕێنەوە.

ئەوەی پێویستە بیزانیت: دوای لێدوانەکەی ترەمپ بۆ دەستبەسەرداگرتنی کەرتی غەززە لە لایەن ئەمریکاوە، هەریەک لە وڵاتانی فەڵەستین، سعودیە، ئیمارات، تورکیا، میسر، ئوردن، چین، فەرەنسا، بەریتانیا، بەرازیل و ڕێکخراوی نەتەوە یەکگرتووەکان ناڕەزایەتی خۆیان دەربڕی.