فەرمانگەیەکی حکومەت ساڵێک و سێ مانگە بێ کارەبایە و لە ئەشکەوت دەچێت

ئاڤا نیوز

 فەرمانگەیەکی حکومەت لە سلێمانی نزیکەی ساڵێک و نیوە بێ کارەبایە و فەرمانبەرەکان بە لایتی مۆبایل و لایتی شەحنەوە ئیش و کارەکانیان ڕایی دەکەن.

وێنە گەورەکە: بەڕێوەبەرایەتیی گواستنەوەی سلێمانی، ماوەی ساڵێک و سێ مانگە کارەبایان نییە، وەکو ئەشکەوت تاریکە و هەر کەسێک کە سەردانی فەرمانگەکە دەکات، دەبێت لایتی مۆبایلەکەی هەڵکات یان ڕووناکییەک لەگەڵ خۆی بباتە ژوورەوە.

زانیاریی پەیامنێر: ژیوار عەبدولڕەحمان، پەیامنێری ئاڤا، چووەتە بەڕێوبەرایەتییەکە، قسەی لەگەڵ بەڕێوەبەری گشتی فەرمانگەکە کردووە، ژوورەکە تاریک بوو، ئەویش لایتی شەحنی لە ماڵەوە لەگەڵ خۆی بردووە و ژوورەکەی ڕووناک کردووەتەوە.

لێدوانی فەرمی: سدیق محەممەد، بەڕێوەبەری گشتی بەڕێوبەرایەتیی گواستنەوەی سلێمانی بۆ ئاڤا میدیا گوتی،

"ساڵێک و سێ مانگە کارەبای نیشتمانیمان نییە، مۆلیدەیەکیشمان هەبوو تێکچوو، سێ ملیۆن و 800 هەزار دیناری پێویستە بۆ چاککردنەوەی، کەچی لایەنی پەیوەندیدار هەر بە خەیاڵیدا نایەت و پارەکەمان بۆ خەرج ناکات".

- "نە وەزیری گواستنەوەو گەیاندن، نە هەڤاڵ ئەبووبەکر، پارێزگاری سلێمانی سەردانی نەکردووین و لێیان نەپرسیونەتەوە".

- "بنکەیەکی پۆلیس لە تەنیشتمانە و دوو ئەمپێر کارەبایان پێداوین، تەنیا دەتوانین کۆمپیوتەرەکانمان داگیرسێنین".