یەکەم کاردانەوەی تورکیا دوای ڕاگەیاندنی ئاگربەستی پەکەکە

 

ئاڤا نیوز

دوای ئەوەی پەکەکە پابەندبوونی خۆی بۆ بانگەوازەکەی عەبدوڵڵا ئۆجەلان ڕاگەیاند، جەودەت یڵماز، جێگری سەرۆککۆماری تورکیا ڕایگەیاند، "قۆناغێکی نوێ و تورکیایەکی بێ تیرۆر هاتە ئاراوە و بە وردییەوە چاودێری دۆخەکە دەکەین".

وێنە گەورەکە: دوای ئەوەی ڕۆژی پێنجشەممە 2025-02-27، لەڕێگەی ئەندامانی شاندی ئیمرالی پەیامی عەبدوڵڵا ئۆجەلان بڵاوکرایەوە، ئەمڕۆ پەکەکە بە فەرمی ڕایگەیاند پابەند دەبین بە پەیامەکەی ئۆجەلان.

لێدوانی فەرمی: جەودەت یڵماز، جێگری سەرۆککۆماری تورکیا، لە تۆری کۆمەڵایەتی ئێکس ڕایگەیاند: دوای ڕاگەیاندنی ئاگربەستی پەکەکە،  ئامانجی تورکیا بۆ گەیشتن بە "تورکیایەکی بێ تیرۆر" دەچێتە ناو قۆناغێکی نوێ. هەڵوەشاندنەوەی ئەو ڕێکخراوە تیرۆریستییە بەبێ هیچ دانووستانێک بە مانای ژینگە و قۆناغێکی نوێ لە ڕووی گەشەپێدان و دیموکراسی و هەروەها لە بواری ئەمنیەتیشدا دێت.

جێگری سەرۆککۆماری تورکیا ئاماژەی بەوەش کرد کە دامەزرێنەری پەکەکە داوای هەڵوەشاندنەوەی کرد. ئێمە لەگەڵ دامەزراوە پەیوەندیدارەکانمان بە وردی بەدواداچوون بۆ ئەم قۆناغە نوێیە و ڕەنگدانەوەکانی دەکەین .