چەند پارێزگایەکی عێراق بەهۆی مانگی ڕەمەزانەوە دەوامی فەرمی کەمدەکەنەوە

 

ئاڤا نیوز

بەبۆنەی مانگی ڕەمەزان، پێنج پارێزگای عێراق دەوامی دامودەزگاکان کاتژمێرێک کەمدەکەنەوە.

چیرۆکی سەرەکی: ساڵانە بەهۆی هاتنەوەی مانگی ڕەمەزان، هەردوو حکومەتی هەرێمی کوردستان و حکومەتی عێراق، لە پێناو ئاسانکاری بۆ فەرمانبەران، ڕۆژانە لەو مانگە کاتژمێرێک دەوامی فەرمی کەمدەکەنەوە.

زانیاریی بەدەستهاتوو: بۆ ئەمساڵ حکومەتی خۆجێی پارێزگاکانی بەغدا و نەینەوا و کەرکووک کاتژمێرێک لە کۆتایی دەوامی فەرمییان لە دامودەزگاکان کەمکردەوە، واتە دەوام لەو دوو پارێزگایە لە کاتژمێر یەکی پاش نیوەڕۆ تەواو دەبێت لەبری دووی پاش نیوەڕۆ.

هاوکات هەردوو پارێزگای ئەنبار و بابل کاتژمێرێک دەوامی فەرمییان کەمکردووەتەوە لە بەیانییەکەی، واتە لە نۆی بەیانی دەستپێدەکات لەبری هەشتی بەیانی.

لە لایەکی دیکەوە: پێشتر وەزارەتی پەروەردە لە هەرێمی کوردستان ڕایگەیاندبوو، ماوەی هەر وانەیەک پێنج خولەک کەمبکرێتەوە لە سەرجەم ناوەندەکانی خوێندن لە مانگی ڕەمەزانی پیرۆزدا.

ئەوەی پێویستە بیزانیت: ئەنجوومەنی وەزیرانی عێراق لە ڕۆژی سێشەممە 2025-02-18، بڕیاریدا کاتژمێرێک دەوامی فەرمی کەمبکاتەوە، یان لە سەرەتای ڕۆژی دەوام یان کۆتایی ڕۆژی دەوام، ئەوەش لە ڕۆژی یەکشەممە 2ـی ئازاری 2025ـەوە دەستپێدەکات.