دوای باسکردنی لە ئاڤا چیرۆکە ناخهەژێنەکەی خورماتوو کۆتاییهات

ئاڤا نیوز

دوای ئەوەی ئاڤا میدیا دەنگی سێ منداڵە بێسەرپەرشتەکەی دوزخورماتووی گەیاند، ئەمڕۆ فەرماندەیەکی زێرەڤانی هاوشان لەگەڵ پەیامنێری ئاڤا سەردانی ماڵەکەیان کرد و دوو لەو منداڵانەی لە ئەستۆ گرت.

چیرۆکی سەرەکی: دوێنێ ئاڤا میدیا چیرۆکی ناخهەژێنی سێ منداڵی بچووکی لە خورماتوو بڵاوکردەوە کە هەرسێکیان کچن و گەورەکەیان تەمەنی حەوت ساڵە، ئەم سێ کچە دوای جیابوونەوەی دایک  و باوکیان بە تەنیا مابوونەوە و لە خانوێکی کەلاوەدا دەژیان و خەڵکی دیکە خواردنیان پێ دەدان.

ئەوەی پێویستە بیزانیت: دوای بڵاوکردنەوەی هەواڵەکە هەر زوو موقەدەم تایەر شێخ مەحموود، جێگری بەتالیۆنی 4ی زێرەڤانی لە سلێمانی ئامادەیی نیشاندا مناڵەکان لەخۆبگرێت.

ئەمەش بزانە: ئەمڕۆ موقەدەم تایەر لەگەڵ ڕۆکان مەحموود، پەیامنێری ئاڤا چووە خورماتوو، دوو لە منداڵەکانی لە ئەستۆ گرت، هەرچەندە تایەر شێخ محمود نیازی وابووە هەرسێ منداڵەکە لە ئەستۆ بگرێت، بەڵام پوری منداڵەکە پێداگربووە کە یەکێک لە منداڵەکان لای ئەو بمێنێتەوە و خۆی بە خێوی بکات.