هەرێمی كوردستان بەشداری لە بوونیادنانەوەی سووریا دەكات

ئاڤا نیوز

لەسەر بانگهێشتی فەرمیی كۆمیسیۆنی ئەوروپا، نوێنەرانی حكومەتی هەرێمی كوردستان لە برۆكسڵ، بەشداری لە كۆنفراسێكی تایبەت بە ئاییندە و بوونیادنانەوەی سووریا دەكات.

چیرۆكی سەرەكی: لە برۆكسڵی پایتەختی بەلجیكا، كۆنفرانسێك بە دەستپێشخەریی یەكێتیی ئەوروپا لە بارەی ئاییندە و بوونیادنانەوەی سووریا بەڕێوەدەچێت، وڵاتانی ئەندام لە یەكێتی ئەوروپا، وڵاتانی دراوسێی سووریا، بانكی نێودەوڵەتی و سندووقی دراوی نێودەوڵەتی تێیدا بەشدارن، لەسەر بانگهێشتنی فەرمیی كۆمیسیۆنی ئەوروپا، د. دلاوەر ئاژگەیی بە نوێنەرایەتی حكومەتی هەرێمی كوردستان بەشداری كرد.

هۆكارە زانراوەكان: ڕۆڵی کاریگەری هەرێمی کوردستان لە ناوچەکە و ئاستی نێودەوڵەتی، ئەو سیاسەتە هاوسەنگەی حكومەتی هەرێمی كوردستان پەیڕەوی دەكات بۆ دابینکردنی ئاسایش و سەقامگیری، هۆکاری بانگهێشتکردنی هەرێمی کوردستان بوو بۆ ئەم کۆنفرانسە نێودەوڵەتیيە.

بۆچی گرنگە: لە کۆنفرانسەکەدا نەخشەڕێگه‌ی بوونیادنانەوەی سووریا لە ڕووی ئابووری و کۆمەڵایەتیيه‌وه‌ تاوتوێ کرا و لایەنە بەشداربووەکان بۆچوونی خۆیان بۆ ئایيندەی ئه‌و وڵاته‌ خستەڕوو.