لە دهۆک هێرش دەکرێتە سەر ڕێوڕەسمێکی پێکهاتەکان و بریندار هەیە

ئاڤا نیوز

گەنجێکی کریستیان بە چەقۆ هێرش دەکاتە سەر ئاهەنگی جەژنی ئەکیتۆ لە شاری دهۆک و سێ کەس بریندار دەکات. ئاڤا میدیا زانیارییەکان ئاشکرا دەکات.

چیرۆکی سەرەکی: پاش نیوەڕۆی ئەمڕۆ سێشەممە 1-4-2025، لەکاتی بەڕێوەچوونی ڕێوڕەسمی جەژنی ئەکیتۆ بە بەشداریی سەدان هاووڵاتیی پێكهاتەكانی كلدان، سریان و ئاشووری لە شاری دهۆک، گەنجێک بە چەقۆ هێرشیکردە سەر ئامادەبووان.

زانیاریی بەدەستهاتوو: بەگوێرەی زانیارییەکانی ئاڤا میدیا، سێ کەس لە ڕووداوەکە برینداربوون کە دوو لەوان ژنێک و گەنجێکن، هاوکات ئاڤا میدیا هەواڵی گیانلەدەستدانی ژنەکە ڕەت دەکاتەوە کە بەهۆی سەختی برینەکەیەوە لەژێر چاودێریی چڕی پزیشکیدایە.

لێدوانی فەرمی: هێمن سلێمان، گوتەبێژی پۆلیسی دهۆک بە ئاڤا نیوزی ڕاگەیاند: لێکۆڵینەوە لەسەر ڕووداوەکە دەستیپێکردووە و هیچ مەترسییەک لەسەر پێکهاتەکان و بەڕێوەچوونی ئاهەنگ و بۆنەکانیان نییە.