ڕێکارەکانی پێدانی قەرز بۆ کڕینی یەکەی بەرهەمهێنانی کارەبا لە وزەی خۆر بۆ بانکەکان ڕەوان دەکرێت

ئاڤا نیوز

بانکی ناوەندیی عێراق هەمواری ڕێکارەکانی پێدانی قەرز بۆ بانکەکان پەیوەست بە بەرهەمهێنانی ئامێری کارەبا بە وزەی خۆر بۆ بانکەکان دەنێرێت و خاوەن کۆمپانیایەکی تایبەتمەندیش جۆری ئامێرەکان بۆ ئاڤا دەخاتەڕوو.

وێنە گەورەکە: بانکی ناوەندیی عێراق بە ئامانجی پێشخستنی گەشەپێدانی بەردەوام و ڕۆڵی پاڵپشتیکارەکەی لە هەنگاونان بەرەو بەکارهێنانی وزەی نوێبوونەوە لە ڕێگەی دەستپێشخەرییەکەیەوە کە لە ڕابردوودا پێشکەشی کردووە، چەند ڕێکارێکی بۆ ئەو مەبەستە ڕاگەیاند.

ڕاگەیێنراوی فەرمی: بەگوێرەی ڕاگەیێنراوی بانکی ناوەندی، بانکەکان پێشینەیەکیان بە بڕی 300 ملیۆن دینار پێدەدرێت بۆ ئەوەی لە ڕێگەیەوە پێشینە بدەنە هاووڵاتیان و سوودەکەشی لە سەدا 2.5 تێنەپەڕێت. دوای پێدانی ئەو پارەیە بە هاووڵاتیان پێویستە بانکەکان لە ماوەی شەش مانگدا بانکی ناوەندی لەو پارانەی کە داویانە بە هاووڵاتیان ئاگادار بکاتەوە.

شێوازی جێبەجێکردن: هەر بە گوێرەی بانکی ناوەندی زۆرترین بڕی پارە کە وەک قەرز بانکەکان دەتوانن بیدەن، 30 ملیۆن دینارە بۆ دانانی سیستمی وزەی خۆر بۆ یەکەیەکی نیشتەجێبوون، بۆ شوێنە بازرگانی و پیشەسازی و کشتوکاڵی و خزمەتگوزاری و کۆمەڵگەکانی نیشتەجێبوون بڕکەی نابێت لە یەک ملیار دینار زیاتر بێت.

لێدوانی فەرمی: لەبارەی شێوازی پێدانی قەرزەکەش دکتۆر ئامانج هەرکی، ئەندامی پەرلەمانی عێراق بە ئاڤا میدیای ڕاگەیاند: هاووڵاتییان بە دوو ڕێگە دەتوانن ناوی خۆیان بۆ وەرگرتنی ئامێری یەکەی بەرهەمهێنانی کارەبا لە وزەی خۆر تۆمار بکەن، یەکەمیان؛ لەڕێگەی ماڵپەڕی "تەموویل" و چەند ماڵپەڕێکی دیکە کە دواتر ڕادەگەیێنرێت.

دووەمیان: هاووڵاتییان ڕاستەوخۆ پارە لە بانک وەرناگرن بۆ وەرگرتنی ئەو ئامێرانە، بەڵکو ئەوانەی ئارەزوومەندن و ناوی خۆیان تۆمار دەکەن، بانکەکان و ئەو کۆمپانیانەی بەشدارن لە پرۆژەکە پارەدار دەکات و دواتر کۆمپانیاکان ئەو ئامێرانە بۆ ئەو هاووڵاتیانە دابین دەکەن.

- ماوەی قەرزەکە لە پێنج ساڵەوە بۆ حەوت ساڵ درێژکراوەتەوە، هەموو بانکە مۆڵەتپێدراوەکان دەتوانن بەشدار بن لە پرۆژەکە.

لەلایەکی دیکەوە: لەبارەی جۆری ئەو ئامێرانەشی ئێستا لە بازاڕدا هەن، هێمن عەبدوڵڵا، کە خاوەنی یەکێک لە کۆمپانیاکانی سۆلارە بە ئاڤا میدیای ڕاگەیاند، دوو جۆر ئامێری وزەی خۆر هەیە،

یەکەم؛ کە ستاندەرەکەیە و گەرەنتیی پێنج ساڵە و پاترییەکەی بەشی 17 ساڵ دەکات لە نێوان شەش بۆ 25 ئەمپێر کارەبا دەدات و تێچووەکەشی چوار هەزار و 200 دۆلارە.

دووەم؛ ئامێری 10 ئەمپێرییە و دوو کاتژمێر بە ڕۆژ و دوو کاتژمێریش بە شەو کارەبا دەدات و نرخەکەی هەزار و 400 دۆلارە، بەڵام ئەم جۆرە هیچ گەرەنتییەکی نییە.