هاتووچۆی هەولێر شۆفێرانی پاس و تاکسی ئاگادار دەکاتەوە

ئاڤا نیوز

 

هاتووچۆی هەولێر ڕایدەگەیێنێ، پێویستە ئەو پاس و تاکسیانەی تابلۆی ئۆتۆمبێلەکانیان کۆنە بیگۆڕن، بە پێچەوانەوە ڕووبەڕووی لێپرسینەوەی یاسایی دەبنەوە.

 

وێنە گەورەکە: ماوەی سێ ساڵە سیستمی نوێی ژمارەی ئۆتۆمبێل خراوەتە بواری جێبەجێکردن و سیستمە نوێیەکە بە تابلۆی لاکێشەیی ناسراوە، بەشێکی زۆر لە شۆفێران تابلۆکانیان لە سیستمی کۆنەوە گۆڕیوە بۆ نوێ، بەشێکی دیکەشیان هێشتا تابلۆی ئۆتۆمبێلەکانیان هەر سیستمی کۆنە.

 

لێدوانی فەرمی: ڕاگەیاندنی بەڕێوەبەرایەتیی هاتووچۆی هەولێر بە ئاڤا میدیای ڕاگەیاند، بەشی هەرە زۆری پاس و تاکسیەکان ژمارەکانیان کۆنە و نەیانگۆڕییووە، تێبینی کراوە بەشێکی زۆریان ژمارەکانیان یان زۆر کاڵبووەتەوە یان شکاوە، بۆیە ئاگادار دەکرێنەوە بە زووترین کات تابلۆکانیان نوێ بکەنەوە.

 

ڕاگەیاندنی هاتووچۆی هەولێر دەڵێت: تابلۆی ئۆتۆمبێل ناسنامەی ئۆتۆمبێلەکەیە، کاڵبوونەوەی ژمارە یان لێبوونەوەی ژمارەیەک لە کۆی ژمارەکە پێچەوانەی یاسایە و ئەگەر تابلۆکەیان نوێ نەکەنەوە ڕووبەڕووی سزای هاتووچۆ دەبنەوە.