وەزارەتی پەروەردە: بوارمان بۆ ئاشكرابوونی پرسیارەكانی پۆلی 12 نەهێشتووەتەوە

ئاڤا نیوز

چەند ڕۆژێكی دیكە تاقیكردنەوەكانی كۆتایی پۆلی 12ی ئامادەیی دەستپێدەكەن و بەرپرسێكی وەزارەتی پەروەردەش دەڵێت، "هەموو ڕێوشوێنێكمان بۆ بەرگرتن لە دزەكردنی پرسیار و گزیكردن گرتووەتە بەر و هیچ بوارێكمان نەهێشتووەتەوە".

وێنە گەورەكە: ڕۆژی 1-6-2025، تاقیكردنەوەكانی كۆتایی پۆلی 12ی ئامادەیی لە هەرێمی كوردستان دەستپێدەكەن و بۆ ئەمساڵ 115 هەزار 787 قوتابی بەشداری لە تاقیكردنەوەكان دەكەن.

لێدوانی فەرمی: سەیوان عەلی ڕەزا، بریكاری وەزارەتی پەروەردە و سەرۆكی لیژنەی باڵای ئەزموونەكان بە ئاڤا میدیای ڕاگەیاند: بە دڵنیاییەوە هەر كەسێك ساختەكاری لە پرۆسەی تاقیكردنەوەكان ئەنجام بدات دەستگیر دەكرێت و دەدرێتە دادگا، كۆنترۆڵی تەواوی دزەكردنی پرسیارەكان و گزیكردنمان كردووە، هێزەكانی ئاساییش و ناوخۆ لەگەڵمانن و هاوكارمانن، لەسەر چۆنیەتی بەڕێكردنی پرسیارەكان و گەیشتنیان بە شوێنی مەبەست.

- پرسیارەكان لە وەزارەتەوە نانێردرێن بۆ پارێزگاكان تاوەكو ئەو ڕۆژەی كە تاقیكردنەوەكان بەڕێوەدەچن، نوێنەری بەڕێوەبەرایەتییە گشتییەكان دێنە هەولێر و پرسیارەكان لە ڕۆژی تاقیكردنەوە دەبەن و بەپێی دووری ناوچەكان كاتەكانمان دابەش كردووە، هێزە ئەمنییەكان هاوكارمانن تاوەكو پرسیارەكان دەگەنە شوێنی مەبەست.

- هیچ بوارێكی ئەوەمان نەهێشتووەتە كە پرسیار دزە بكات یان ئاشكرا بێت، داوا لە قاچاخچییەكان دەكەم هیچ هەوڵێك نەدەن، چونكە بێ ئەنجام دەبێت.