تەندروستی عێراق دوایین ئاماری توشبوون و مردن  بە تای خوێنبەربوون بۆ ئاڤا ئاشکرا دەکات

ئاڤا نیوز

وەزارەتی تەندروستی عێراق ئاشکرایکرد، ژمارەی توشبوون بە تای خوێنبەربوون لەسەرەتای ئەمساڵەوە بۆ 107 تووشبوو بەرزبووەتەوە، لەو ژمارەیەش 16 تووشبوویان گیانیان لەدەستداوە، داوای گرتنەبەری ڕێوشوێنی پێویست بۆ سنووردارکردنی دیاردەی لەوەڕاندنی نایاسایی و بازرگانی ئاژەڵداری دەکات.

چیرۆکی سەرەکی: چەند مانگێکە ڤایرۆسی تای خوێنبەربوون لە پارێزگاکانی عێراق و هەرێمی کوردستان بڵاوبووەتەوە کە لەڕێگەی ئاژەڵەوە دەگوازرێتەوە، وەزارەتی تەندروستی عێراقیش هۆکارەکەی بۆ  خراپی هۆشیاریی تەندروستی لای هەندێک لە بەخێوکەرانی ئاژەڵ و خراپی پاکوخاوێنی ناو کێڵگەکان دەگەڕێنێتەوە کە بووەتە ژینگەیەکی لەبار بۆ بڵاوبوونەوەی ئەو پەتایە.

لێدوانی فەرمی: سەیف بەدر، گوتەبێژی وەزارەتی تەندروستی عێراق  بە ئاڤا میدیای ڕایگەیاند: ژمارەی توشبوون بە تای خوێنبەربوون لەسەرەتای ئەمساڵەوە بۆ 107 تووشبوو بەرزبووەتەوە، لەو ژمارەیەدا 16 تووشبوویان گیانیان لەدەستداوە، زۆرترین توشبوو و مردنیش بەهۆی پەتاکەوە لە پارێزگای زیقار تۆمارکراوە.

ژمارەکان وادەڵێن:  ژمارەی مردن بە پەتای خوێنبەربوون بەگوێرەی پارێزگاکان:

زیقار: 31 تووشبوون و یەک مردن.
 
بەغدا (ڕەسافە): 12 تووشبوون و پێنج مردن.

واست: 12 تووشبوون و یەک مردن.

موسەننا: هەشت تووشبوون و دوو مردن.

مەیسان: هەشت تووشبوون.

نەینەوا: شەش تووشبوون.

کەرکووک: پێنج تووشبوون و چوار مردن.

بەسرە: پێنج تووشبوون.

دیالە: پێنج تووشبوون و یەک مردن.

بەغدا (کەرخ): چوار تووشبوون.

دیوانیە: سێ تووشبوون.

دهۆک: دوو تووشبوون و یەک مردن.

بابل: دوو تووشبوون و یەک مردن.

هەر یەکە لەپارێزگاکانی هەولێر، سەڵاحەدین ، کەربەلا و ئەنبار یەک تووشبوون.