درۆنێک لە شاخی تەکیەی سنووری سلێمانی کەوتە خوارەوە

ئاڤا نیوز


درۆنێکی بۆمبڕێژکراو لە شاخی تەکیە دەکەوێتە خوارەوە و بەڕێوەبەری ناحیەکەش بە ئاڤای ڕاگەیاند: هیچ زیانێکی نەبووە. 


چیرۆکی سەرەکی: نزیکەی مانگێکە بەدرۆنی بۆمبڕێژکراو هێرش دەکرێتە سەر چەند ناوچەیەکی کوردستان و تاوەکو ئێستا سەرچاوەی ئاراستەکردنی ئەو درۆنانە دیار نییە و هیچ لایەنێکیش بەرپرسیارییەتی هیرشەکانی نەگرتووەتە ئەستۆ. 

لێدوانی فەرمی: مەمەد ڕەشید، بەڕێوەبەری ناحیە تەکیە لە سنووری قەزای چەمچەماڵی سلێمانی بە ئاڤای ڕاگەیاند: درۆنێکی بۆمبڕێژکراوە خۆی کێشاوە بە شاخی تەکیە و هیچ زیانێکی گیانی و سرووشتی نەبووە، هێزە ئەمنییەکان بۆ لێكۆڵینەوەی زیاتر چوونەتە شوێنی ڕووداوەکە. 

پەیوەست بەم بابەتەوە: بەیانی ئەمڕۆ سێشەممە، لە ڕێگەی درۆنی بۆمبڕێژکراو هێرشێکی تیرۆرستی کرایە سەر کێڵگەی نەوتی سەرسنک لە ناحیەی چەمانکێ لە پارێزگای دهۆک و بەهۆیەوە  کۆمپانیای HKN ENERGYـی ئەمریکی کارەکانی ڕاگرتووە.