شاندێکی هەرێمی کوردستان دەچێتە بەغدا

ئاڤا نیوز

بڕیارە شاندێکی هەرێمی کوردستان سەردانی بەغدا بکات، سەرچاوەیەکیش لە وەزارەتی دارایی و ئابووریی هەرێمی کوردستان دەڵێت، بۆ گفتوگۆکردن و ڕوونکردنەوە لەسەر داهاتە نانەوتییەکان دەچن.

 

زانیاریی تایبەت: سەرچاوەیەکی باڵا لە وەزارەتی دارایی و ئابووریی حکومەتی هەرێمی کوردستان بە ئاڤا میدیای ڕاگەیاند، ئەم هەفتەیە شاندێک سەردانی بەغدا دەکات، کە پێکهاتوون لە نوێنەری ئەنجوومەنی وەزیران، وەزارەتەکانی دارایی و ئابووری، شارەوانی و گەشتوگوزار، کارەبا لەگەڵ نوێنەری چاودێریی دارایی و بەڕێوەبەری باج.

 

سەرچاوەکەی وەزارەتی دارایی و ئابووری وتیشی، پێشتر شاندێکی باڵای هەرێمی کوردستان سەردانی بەغدای کرد و لەگەڵ وەزارەتی دارایی عێراق باسی داهاتی نانەوتیان کردبوو، بەڵام ڕێککەوتن لەسەر کۆمەڵێک وردەکاری ماوە.

 

ئەوەی پێویستە بیزانیت: ئاڤا لە سەرچاوەکەی وەزارەتی داراییەوە زانیویەتی، شاندەکەی هەرێمی کوردستان لەگەڵ شاندێک لە وەزارەتی دارایی عێراق کۆ دەبنەوە تاوەکوو ڕوونکردنەوەیان لەبارەی داهاتە نانەوتییەکان پێبدەن کە چۆنە و چەندە، ڕەنگە دانیشتن و کۆبوونەوەی دیکەش لەمبارەیەوە بەردەوام بێت.