سکاڵا لەسەر ئەو کەسانە تۆمار دەکرێت کە بانگەشە بۆ کاری نەشیاو و لەشفرۆشی دەکەن

ئاڤا نیوز 

 

دەستەی سەربەخۆی مافی مرۆڤ داوا لە دەستەی مافی گشتیی لە سەرۆکایەتیی داواکاری گشتیی دەکات سنوورێک بۆ ئەو کەسانە دابنرێت کە لە تۆڕە کۆمەڵایەتییەکان گوتە و لێدوان و کاری نەشیاو بڵاودەکەنەوە کە دوورن لە ئاداب و یاسا و ئایین و بەها کۆمەڵایەتییەکان.

 

ڕاگەیێنراوی فەرمی: دەستەکە لە ڕاگەیێنراوێکدا دەڵێت: ماوەیەکە بەشێک لەو کەسانەی لە سۆشیاڵ میدیا بەدیار کەوتوون بە جۆرێک بانگەشە بۆ کاری نەشیاو و لەشفرۆشی دەکەن و بەتایبەتی کار لەسەر هەستی منداڵان دەکەن بەبێ بوونی هیچ سانسۆرێک کە بتوانرێ ڕێگریان لێبکرێت، ئەوەش کاریگەریی گەورەی دەبێت لەسەر ئاکار و بەلاڕێدابردنی منداڵان و گەنجەکانمان بە تایبەتی و ئاسایشی کۆمەڵایەتی بە گشتی.

 

زانیاریی زیاتر: لەبەر ئەمەش دەستەی سەربەخۆی مافی مرۆڤ لە ڕێگەی سکاڵایەکەوە داوا لە دەستەی مافی گشتیی لە سەرۆکایەتیی داواکاری گشتیی کردووە لەپێناو پاراستنی بەها کۆمەڵایەتییەکان و تێکنەدانی شیرازەی خێزان و بەرژەوەندی گشتیی کۆمەڵگە کار لەسەر ئەو بابەتە بکەن و ڕێکاری یاسایی بەرامبەر ئەو جۆرە کەسانە بگرنەبەر.