دابەشکردنی زەوی لە زاخۆ دەستپێدەکات

ئاڤا نیوز 

 

تیروپشک بۆ دابەشکردنی نزیکەی پێنج هەزار زەوی لە زاخۆ دەکرێت و دوای ئەوە دەست بە دابەشکردنی دەکرێت، دوای زاخۆ لەهەولێر و دهۆکیش پڕۆسەکە دەستپێدەکات.

 

وێنە گەورەکە: کاتژمێر 10:00ـی ڕۆژی چوارشەممە 16-10-2024، تیروپشک بۆ نزیکەی پێنج هەزار زەوی دەکرێت و لە ماوەی هەفتەیەکدا سەرجەم ئەو فەرمانبەر و خانەنشینانەی ناویان دەردەچێت زەوی وەردەگرن.

 

لێدوانی فەرمی: یونس محەممەد، سەرۆکی شارەوانیی زاخۆ بە ئاڤا نیوزی ڕاگەیاند، "بۆ ئەم قۆناغە چوار هەزار و 747 پارچە زەوی تیروپشکی بۆ دەکرێت، وردبینی لە سەرجەم ناوەکان کراوە و  دوای دەرچوونی ناوەکان دەتوانن مامەڵەی وەرگرتنی زەوییەکانیان دەست پێبکەن".

 

ئەوەی پێویستە بیزانیت: قۆناغی یەکەمی دابەشکردنی زەوی لە زاخۆ دەستپێدەکات، بۆ قۆناغی دووەمیش سێ هەزار و 500 دۆنم زەوی ئامادەکراوە و ناوی زیاتر لە 12 هەزار فەرمانبەر گەڕاوەتەوە بۆ ئەوەی ناویان بچێتە نێو تیروپشک و زەوی وەربگرن.

 

لەلایەکی دیکەوە: لە هەولێر و دهۆک 17 هەزار و 200 پارچە زەوی ئامادەیە دوای وردبینی لە فۆڕمەکان لە وەزارەتی شارەوانی و گەشتوگوزار پڕۆسەکە لە سەنتەری ئەو دوو پارێزگایەش دەستپێدەکات.