لە سلێمانی تیروپشک بۆ دابەشکردنی شەش هەزار پارچە زەوی دەکرێت

ئاڤا نیوز

 

تیروپشک بۆ ناوی شەش هەزار فەرمانبەر لە سلێمانی دەکرێت، بۆ ئەوەی زەویان بەسەردا دابەش بکرێت، وتەبێژی شارەوانی سلێمانی دەڵێت "تیروپشکەکە بە چەند قۆناغێک دەکرێت".

 

وێنە گەورەکە: پرۆسەی دابەشکردنی زەوی بەسەر فەرمانبەران و خانەنشینان بەردوامە و نزیکەی 350 هەزار فەرمانبەر و خانەنشین دەگرێتەوە.

 

لێدوانی فەرمی: زەردەشت ڕەفیق، وتەبێژی سەرۆکایەتی شارەوانی سلێمانی بە ئاڤا نیوزی ڕاگەیاند: شەش هەزار فەرمانبەری سەر بە وەزارەتەکانی کارەبا و کار و کاروباری کۆمەڵایەتی و بەڕێوەبەرایەتی گشتیی شارەوانییەکان، ڕەزامەندییان لەسەر دراوە و وردبینییان تەواو بووە و زەوییان پێ دەدرێت.

 

وتەبێژی سەرۆکایەتی شارەوانی سلێمانی دەڵێت: ئەم هەفتەیە لەبەر یادی سلێمانی تیروپشکەکە ناکەین، بەڵام هەفتەی داهاتوو تیروپشکەکان بەچەند قۆناغێک دەکەین.

 

زانیاریی زیاتر: پێش هەڵبژاردنی خولی شەشەمی پەرلەمانی کوردستان، شارەوانی سلێمانی تیروپشکی بۆ ناوی هەزار و 600 فەرمانبەر لە قۆناغی یەکەم دا کرد و زەوی پێدان.

 

ئەوەی پێویستە بیزانیت: ئەو زەوییانەی لە سلێمانی بەسەر فەرمانبەراندا دابەش دەکرێن، لە لاوان لەسەر ڕێی تانجەڕۆ، هاوکات فەرمانبەران و سۆتکە لەسەر ڕێی تاسڵوجەیە.