ڕاوێژکارێکی سوودانی: سەرۆکوەزیران دەیەوێت کێشە داراییەکانی نێوان هەولێر و بەغدا چارەسەربکات

ئاڤا نیوز

ڕاوێژکاری سیاسیی سەرۆکوەزیرانی عێراق سەردانەکەی ئەمڕۆی سوودانی بۆ هەرێمی کوردستان بە زۆر گرنگ ناو دەبات و دەڵێت، سوودانی دەیەوێت کێشە داراییەکانی نێوان هەولێر و بەغدا چارەسەربکات و داواش دەکات "حکومەتێکی بەهێز و هاوسەنگ" لە هەرێمی کوردستان پێکبهێنرێت.

 

وێنە گەورەکە: ئەمڕۆ چوارشەممە محەممەد شیاع سوودانی، سەرۆکوەزیرانی عێراق بە یاوەری شاندیکی باڵای حکومەتەکەی سەردانی هەرێمی کوردستان دەکات و لەگەڵ بەرپرسانی هەرێمی کوردستان کۆدەبێتەوە.

 

لێدوانی فەرمی: سەبهان مەلا جیهاد، ڕاوێژکاری سیاسیی سەرۆکوەزیرانی عێراق بە ئاڤا میدیای ڕاگەیاند، بە لەبەرچاوگرتنی ئەو دۆخەی ئێستا ناوچەکە پێیدا تێپەڕدەبێت، سەردانەکەی ئەمڕۆی سەرۆکوەزیرانی عێراق بۆ هەرێمی کوردستان گرنگییەکی گەورەی هەیە، چونکە سەردانەکە جەختکردنەوەیە لە هەڵوێستی یەکگرتووی عێراق و دووپاتکردنەوەی ئەو هەوڵوێستە هاوبەشەیە کە وڵات بەشێک نییە لە ململانێکانی ناوچەکە، هاوکات سەردانەکە بۆ بەهێزکردنی هەماهەنگی نێوان حکومەتی هەرێمی کوردستان و حکومەتی فیدراڵە لە دۆسییەی پەیوەندییەکانی دەرەوە.

 

بەوتەی ئەو ڕاوێژکارەی محەمەد شیاع سوودانی، بەشێکی دیکەی ئامانجی سەردانەکە بۆ تاوتوێکردنی ئەو دۆسییە هەڵپەسێردراوانەیە کە لەبوارەکانی دارایی و نەوت و دۆسییەکانی دیکە لە نێوان بەغدا و هەولێردا ماون، جەختیش دەکاتەوە، لە حکومەتەکەی سوودانیدا هەنگاوی بەرچاو نراون بۆ یەکلاییکردنەوەی زۆرێک لەو دۆسیانە و لەم سەردانەی ئەمڕۆشدا گفتوگۆ لەسەر کێشە هەڵپەسێردراوەکان و چۆنیەتی چارەسەرکردنیان دەکرێت، لەم بوارەشدا هەردوولا جددین بۆ چارەسەری کێشەکان لە چوارچێوەی دەستووردا.

 

لەلایەکی دیکەوە: سەبهان مەلا جیهاد ئاشکرایکرد کە سێیەم دۆسیەی سەردانەکەی سوودانی بۆ هەرێمی کوردستان، پەیوەستە بە دۆسیەی پێکهێنانی کابینەی نوێی حکومەتی هەرێمی کوردستان دوای هەڵبژاردنی پەرلەمانی کوردستان، سوودانی هەوڵ دەدات لە نزییکردنەوەی بۆچوونی لایەنەکان ڕۆڵبگێڕێت بۆ پێکهێنانی حکومەتێکی "بەهێز و هاوسەنگ" لە هەرێمی کوردستان، چونکە باوەڕی وایە بەهێزی هەرێم و پاراستنی یەکگرتووییەکەی لە بەرژەوەندی تەواوی عێراقدایە، سوودانی  ئەو پەیامەشی لە چوارچێوەی کۆبوونەوەکانیدا لە هەولێر و دواتریش لە سلێمانی دووپات دەکاتەوە.