درێژترین پیتزا لە عێراق و هەرێمی کوردستان لە حاجیاوا دروستکرا

ئاڤا نیوز 

 

لە قەزای حاجیاوا سەر بە ئیدارەی ڕاپەڕین گەورەترین پیتزا لەسەر ئاستی عێراق و هەرێمی کوردستان دروستکرا و پێشکەشی ژینگەپارێزان کرا.

 

چیرۆکی سەرەکی: ئەمڕۆ شەممە 14-12-2024، لە یەکێک لە چێشتخانەکانی قەزای حاجیاوا  گەورەترین پیتزا لەسەر ئاستی عێراق و هەرێمی کوردستان دروستکرا.

لێدوانی فەرمی: شێف شاڵاو نادر، بە ئاڤا نیوزی ڕاگەیاند: بیرۆکەی پیتزاکە لەوە سەری هەڵداوە، بڕیار بوو بۆ هەر ژینگەپارێزێک پیتزایەک دروست بکەم، وەکو خزمەتێک بە ژینگەپارێزان، بەڵام دواتر بڕیارماندا یەک پیتزای گەورە دروست بکەین و هەمووان پێکەوە کۆبکەینەوە.

 

زانیاریی زیاتر: پیتزاکە درێژییەکەی حەوت مەتر و 20 سانتیمەترە و پانییەکەشی یەک مەتر و 30 سانتیمەترە، زیاتر لە 50 کێلۆ هەویر و 40  کێلۆ پەنیر و 20 کێلۆ گۆشتی مریشکی تێدا بەکار هێندراوە.

 

شێف شاڵاو ئاماژە بەوەش دەکات کە لەبەر نەبوونی فرنی گەورە بەچەند پارچەیەک پیتزاکەیان برژاندووە و دواتر پێشکەشی ژینگە پارێزان کراوە.

 

بۆچی گرنگە: خزمەتکردن بە ژینگەپارێزان دەبێتە هۆی زیاتر هاندان بۆ ئەم توێژەی کۆمەڵگە، ئەنجامدانی کاری جیاواز و ناوازە دەبێتە هۆی ناوبانگ بۆ ناوچەکە.