لە خوورماتوو چەکدارێکی داعش بەر لە ئەنجامدانی تەقینەوەیەک دەستگیرکرا

ئاڤا نیوز

 

چەكدارێكی داعش لە شارۆچکەی خوورماتووی سەر بە پارێزگای سەڵاحەدین دەستگیرکرا، کە پلانی داڕشتبوو لەڕێگای بۆمبی چێنراو تەقینەوەیەک لە شارۆچکەکە ئەنجامبدات.

 

ڕاگەیێنراوی فەرمی: دەزگای ئاسایشی نیشتیمانیی عێراق لە ڕاگەیێنراوێكدا بڵاویكردەوە، چەکدارێکی داعشیان لە خوورماتوو دەستگیرکردووە کە بۆمبێکی چێنراوی لە گۆڕستانێک شاردووەتەوە بۆئەوەی کردەیەکی  تیرۆرستی بەهۆیەوە لە شارۆچکەکە ئەنجامبدات.

 

زانیاریی زیاتر: دەزگای ئاسایشی نیشتیمانیی عێراق ڕاشیگەیاندووە، بەپێی زانیارییەكان بە پشتبەستن بە سەرچاوە هەواڵگرییەكان، تۆمەتبارەکە سەر بە 'ویلایەتی كەركووك'ـی پاشماوەكانی ڕێكخراوی تیرۆرستی داعش بووە و لە ماوەی ڕابردوودا ماددەی تەقەمەنی و كەلوپەلی لۆجستی بۆ تیرۆرستان دابینكردووە، هەروەها لە تۆڕە كۆمەڵایەتییەكان بیری توندڕەویی بڵاوكردووەتەوە و پاڵپشتی لە داعش كردووە.

 

ڕاشیانگەیاندووە، دوای دەستگیركردنی لەلایەن هێزە ئەمنییەكانەوە، چەکدارە دەستگیرکراوەکە پەڕاوی لێكۆڵینەوەی بۆ كراوەتەوە و دانی بە تاوانەكەیدا ناوە، كە نیازی هەبووە تەقینەوەیەك لە شارۆچكەی خوورماتوو ئەنجامبدات.