یەکێتیی ئەوروپا تاوتوێی هەڵگرتنی سزاکانی سەر سووریا دەکات

ئاڤا نیوز

 

 لە کۆتایی ئەم مانگە یەکێتیی ئەوروپا بۆ هەڵگرتنی سزا نێودەوڵەتییەکانی سەر سووریا لە برۆکسلی پایتەختی بەلجیکا کۆدەبێتەوە.

 

وێنەگەورەکە: دوێنێ 12-1-2025، لە ڕیازی پایتەختی سعودییە کۆبوونەوەی فراوانی وەزیرانی دەرەوەی عەرەبی و وڵاتانی ڕۆژئاوا بۆ تاوتوێ کردنی دۆخی سووریای نوێ بەڕێوەچوو و  داوای هەڵگرتنی سزاکانی  سەر سووریایان کرد.

 

لێدوانی فەرمی: کایا کاڵاس، بەرپرسی سیاسەتی دەرەوەی یەکێتیی ئەوروپا ڕایگەیاند، لە کۆتایی ئەم مانگەدا وەزیرانی دەرەوەی یەکێتیی ئەوروپا لە برۆکسل کۆدەبنەوە و تاوتوێی هەڵگرتنی سزا نێودەوڵەتییەکانی سەر سووریا دەکەن.

 

لەلایەکی دیکەوە: ئەنالینا بێربۆک، وەزیری دەرەوەی ئەڵمانیا لە میانی بەشداریکردنی لە کۆبوونەوەی وەزیرانی دەرەوەی وڵاتانی عەرەبی و ڕۆژئاوا ڕایگەیاند: ''سزاکانی سەر هاوبەشانی بەشار ئەسەد، سەرۆکی پێشووی سووریا کە تاوانی دژی مرۆڤایەتییان لە کاتی شەری ناوخۆ ئەنجامداوە وەک خۆی دەمێنێتەوە''.

 

باکگراوند: لە سەردەمی دەسەڵاتی بەشار ئەسەد وڵاتانی ڕۆژئاوا چەندین سزای نێودەوڵەتییان بەسەر سووریا دا سەپاند، بەڵام دوای کۆتایی هاتنی دەسەڵاتی بەشار ئەسەد لەسەر دەستی هێزەکانی تەحریرولشام داوای هەڵگرتنی سزا نێودەوڵەتییەکان دەکرێت لە بەرژەوندیی خەڵکی ئەو وڵاتە.