جووتسايدى شێخان-لالش 20%ـی تەواوكراوە

ئاڤا نیوز

پرۆژەی جووتسایدی شێخان - لالش لە سنووری پارێزگای دهۆک بە گوژمەی نزیکەی 27 ملیار دینار جێبەجێ دەکرێت، ئێستا كاركردن لەو پڕۆژەیە بەردەوامە و 20%ـی كارەكانی تەواوكراوە.

وێنە گەورەكە: لەچوارچێوەی كارنامەی حكومەتی هەرێمی كوردستان بۆ بەهێزكردنی ژێرخانی ئابووریی هەرێمی كوردستان و پەرەپێدانی سێكتەری ڕێگاوبان، مانگێك لەمەوبەر بەردی بناغەی پڕۆژەی جووتسایدی شێخان-لالش دانرا، كە ڕێگەكە لە شێخان دەست پێدەکات تاکوو دەروازەی پەرستگەی لالش و ماوەی تەواوکردنی 400 ڕۆژە.

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان ڕایدەگەیەنێت، پرۆژەکە بە شێوازێکی سەردەمییانە و بە درێژایی 9 کیلۆمەتر دروست دەکرێت؛ كە ئێستا 20%ـی كارەكانی پڕۆژەكە كۆتایی هاتووە و بە تەواوبوونیشی، دەبێتە هۆی کەمکردنەوەی ڕووداوی هاتووچۆ، هەروەها ئاسانکارییەکی باش بۆ شۆفێران و خزمەتێکی زۆر بە هاووڵاتییانی سنووری پارێزگای دهۆک دەکات.

حکومەتی هەرێمی کوردستان دووپاتی دەكاتەوە، كە بەردەوام دەبێت لە خزمەتکردنی هاووڵاتییان و ئاوەدانکردنەوەی ناوچە جیاوازەکانی هەرێمی کوردستان و بەهێزکردنی ژێرخانی ئابووریی وڵات.