هاکان فیدان: دەمانەوێت پرسی هەسەدە لە سووریا بێ خوێنڕشتن چارەسەر بکرێت

ئاڤا نیوز

 

هاکان فیدان، وەزیری دەرەوەی تورکیا ڕایدەگەیێنێ، دەیانەوێت پرسی هێزەکانی سووریای دیموکرات ' هەسەدە'  لە سووریا "بێ خوێنڕشتن چارەسەر بکرێت".

چیرۆکی سەرەکی: هاکان فیدان، وەزیری دەرەوەی تورکیا، لە کۆنگرەیەکی ڕۆژنامەوانی لەگەڵ محەممەد بن عەبدولڕەحمان ئال سانی، سەرۆکوەزیران و وەزیری دەرەوەی قەتەر لە دەوحە باسی چەند پرسێکی هەنووکەیی لە ڕۆژهەڵاتی ناوەڕاست کرد یەکێکیان پرسی هێزەکانی سووریای دیموکرات 'هەسەدە' بوو لە سووریا.

 

لێدوانی فەرمی: هاکان فیدان، وەزیری دەرەوەی تورکیا جەختی لە کاری هاوبەشی قەتەر و سووریا کردەوە و ڕایگەیاند، "تیرۆر لە سووریا جێگەی نابێتەوە، بۆ ئەمەش سازش ناکەین و نەرمی نانوێنین، هیوادارین پرسەکە بە بێ خوێنڕێشتن چارەسەر بکرێت". فیدان ئاماژەی بۆ ئەوەشکرد ئەم پرسە ئیدارەی نوێی سووریا چارەسەری دەکات و ئەوانیش وەک تورکیا هەموو پشتیوانییەکیان دەکەن و بەمزووانە هەنگاوەکانی ئیدارەی نوێی سووریا  لەسەر ئەو پرسە دەبینرێت.

 

لەلایەکی دیکەوە: وەزیری دەرەوەی تورکیا گوتیشی، لەگەڵ هەریەک لە وڵاتانی عێراق، تورکیا، ئوردن و سووریا کاری هاوبەش و هەنگاوێی نوێ دەنێن بۆ بەرەنگاربوونەوەی " تیرۆر" و پاراستنی سەقامگیری سنووری هاوبەشی نێوانیان.