ئیدارەی ڕۆژئاوای كوردستان نەوتەكەی ڕادەستی حكومەتی سووریا دەكات

ئاڤا نیوز

بەرپرسانی ئیدارەی خۆسەر لە ڕۆژئاوای كوردستان لەگەڵ وەزارەتی نەوتی سووریا ڕێككەوتن لەسەر ڕادەستكردنی نەوت بە حكومەتی نوێی دیمەشق.

 

چیرۆكی سەرەكی: دوای کەوتنی دەسەڵاتی بەشار ئەسەد، چەند ناوچەیەكی باكووری ڕۆژهەڵاتی سووریا كەوتە دەستی هێزەكانی سووریای دیموكرات 'هەسەدە' كە دەوڵەمەندن بە كێڵگەی نەوتی و غازی سروشتی، دوای گفتوگۆی نێوان بەرپرسانی ئیدارەی خۆسەر لە ڕۆژئاوای كوردستان و حكومەتی قۆناغی ڕاگوزەری سووریا لە دیمەشق، دواجار گەیشتنە ڕێككەوتن لەسەر ڕادەستی بەرهەمی نەوت و غازی سروشتی ئەو كێڵگانە.

 

لێدوانی فەرمی: ئەحمەد سلێمان، بەرپرسی بەشی پەیوەندییەکانی وەزارەتی نەوتی سووریا بە ئاژانسی ڕۆیتەرزی ڕاگەیاندووە، لەگەڵ ئیدارەی رۆژئاوای كوردستان رێکكەوتوون پێداچوونەوە بە گرێبەستە نەوتییەکان بکەن، بەجۆرێک لە بەرژەوەندیی گەل بێت.

ئاشكراشی دەكات، ئیدارەی خۆسەر ڕازی بووە بەوەی نەوتی كێڵگەكانی ئەو ناوچانەی لەدوای نەمانی حکومەتی بەشار ئەسەد کەوتووەتە دەستی، رادەستی وەزارەتی نەوتی سووریا بکات.

 

ناوەڕۆكی ڕێككەوتنەكە چییە: گرێبەستەکە بە شێوەیەکی سەرەتایی بۆ سێ مانگ ئەنجام دراوە، بەجۆرێك؛ رۆژانە 150 هەزار بەرمیل نەوت و ملیۆنێک مەتر سێجا غاز ڕادەستی حكومەتی ڕاگوزەری سووریا دەكرێت.