تورکیا بەشداری لوتکەی ئەوروپا دەکات و دەستپێشخەریەک بۆ ڕووسیا و ئۆکراینا دەخاتەڕوو

ئاڤا نیوز

 

تورکیا بە ڕاگەیاندنی دەستپێشخەریەک بۆ کۆبوونەوەی نێوان ڕووسیا و ئۆکراینا بەشداری لە لوتکەی لەندەن دەکات.

 

وێنە گەورەکە: تورکیا وەک دەوڵەتێکی ئەندام لە ناتۆ بانگهێشتی لوتکەی لەندەن کراوە بۆ کۆبوونەوەی سەرکردەی وڵاتە ئەوروپیەکان لەپێناو گفتوگۆکردن سەبارەت بە ئاسایشی وڵاتانی ئەوروپا و هەوڵدان بۆ دۆزینەوەی ڕێگەچارەیەک بۆ جەنگی نێوان ڕووسیا و ئۆکراینا تەوەری سەرەکی لوتکەکە دەبێت.

 

بڵاوکراوەی فەرمی: بەپێی میدیا فەرمیەکانی تورکیا کە لە سەرچاوە دیپلۆماسیەکانی وەزارەتی دەرەوەی ئەو وڵاتەوە گواستیویانەتەوە، هاکان فیدان، وەزیری دەرەوەی تورکیا لە لوتکەی لەندەن بۆ کۆبوونەوەی سەرکردە ئەوروپیەکان وتارێک پێشکەش دەکات و تێیدا دەستپێشخەریەک بۆ کۆبوونەوەی نێوان ڕووسیا و ئۆکراینا لە تورکیا دەخاتەڕوو.

 

بۆچی گرنگە: گرنگی دەستپێشخەریەکەی تورکیا لەوەدایە کیێڤ دەگەڕێنێتەوە سەر مێزی گفتوگۆکان لەگەڵ ڕووسیا بۆ بڕیاردان لە سەر جەنگ، لە کاتێکدا هەموو هەوڵەکانی ترەمپ و ئەمریکا بۆ دوورخستنەوەی کیێڤە لە کۆبوونەوەی سەرۆکەکان لە سعودیە.

 

زانیاریی زیاتر: ڕۆژی شەممە 1-3-2025 هاکان فیدان لە پەیوەندیەکی تەلەفۆنیدا لەگەڵ هاوتا ڕووسیەکەی سێرگی لاڤرۆڤ پرسی جەنگی نێوان ئۆکراینا و ڕووسیا و دوایین گۆڕانکاریەکانیان تاوتوێ کرد.