دەستەی ڕاگەیاندنی عێراق باج لەسەر کەسانی بەناوبانگ لە تۆڕە کۆمەڵایەتییەکان دادەنێت

ئاڤا نیوز

دەستەی ڕاگەیاندن و پەیوەندییەکانی عێراق ڕێنمایی بۆ شێوازی کارکردنی کەسانی بەناوبانگ و کاریگەر لە تۆڕە کۆمەڵایەتییەکان دەرکرد و بڕیاریدا هەر کەسێک لە 100 هەزار بینەر (فۆڵۆوەرز) زیاتری هەبێت باجی بەسەردا بسەپێنرێت.

 

ئەوەی پێویستە بیزانیت: دەستەکە هەموو کەسانی بەناوبانگیش لە تۆڕە کۆمەڵایەتییەکان پابەند دەکات بەوەی سەروەری نیشتیمانیی بپارێزن، پشتیوانی دەزگا ئەمنییەکان بن بۆ ڕووبەڕووبوونەوەی تیرۆر و توندڕەوی، خۆیان بەدوور بگرن لە گوتاری مەزهەبیی و ڕەگەزی کە ئاشتی کۆمەڵایەتی دەخاتە مەترسییەوە.

 

ڕاگەیێنراوی فەرمی: دەستەی ڕاگەیاندن و پەیوەندییەکانی عێراق بڕیاریشدا ساڵانە باجی تۆمارکردن بەسەر کەسانی بەناوبانگ و کاریگەر لە تۆڕە کۆمەڵایەتییەکان بسەپێنێت، ئەویش بەگوێرەی ژمارەی بینەرەکانیان، باجەکەش بەم شێوەیە دەبێت:

 

زیاتر لە پێنج ملیۆن بینەر (فۆڵۆوەرز): ساڵانە یەک ملیۆن دینار باج دەدات.

لەنێوان 3 بۆ 5 ملیۆن بینەر: ساڵانە 850 هەزار دینار باج دەدات.

لەنێوان 1 بۆ 3 ملیۆن بینەر: ساڵانە 650هەزار دینار باج دەدات..

لەنێوان 500 هەزار بۆ یەک ملیۆن بینەر: ساڵانە 450 هەزار دینار باج دەدات.

لەنێوان 100 هەزار بۆ 500 هەزار بینەر: ساڵانە 250 هەزار دینار بۆ 350 هەزار دینار باج دەدات.