دەروازەکانی عێراق: لە دوو مانگدا داهاتمان زیاتر لە 400 مليار دينار بووە

ئاڤا نیوز

سەرۆکی دەستەی دەروازە سنوورییەکانی عێراق ڕایگەیاند، بەهۆی بە ئەلیکترۆنییکردنی کاروبارەکان داهاتی دەروازەکان زیادیکردووە و لە دوو مانگی سەرەتای ئەمساڵدا، داهاتیان زیاتر لە 400 مليار دينار بووە.

ژمارەکان وادەڵێن: بەگوێرەی ئاماری فەرمی دەستەی دەروازە سنوورییەکان، ساڵی ڕابردوو داهاتی دەروازە سنوورییەکانی عێراق دوو ترلیۆن و 131 مليار دينار بووە، واتە مانگانە داهاتی هەموو دەروازەکان پێکەوە نزیکەی 177 ملیار دینار بووە.

لێدوانی فەرمی: لیوا عومەر وائیلیی، سەرۆکی دەستەی دەروازە سنوورییەکانی عێراق بۆ ئاژانسی هەواڵی فەرمیب وتی: ئێستا کاری هەموو دەروازە وشکانی، ئاویی و ئاسمانییەکان بە یەک ژووری ئۆپەراسیۆنی ناوەندییەوە بەستراونەتەوە و کارەکان بە ئەلیکترۆنیی کراون.

- بە ئەلیکترۆنییکردنی کاروبارەکان هەموو بوارەکانی گرتووەتەوە، لەوانەش پشکنینی کاڵاکان، وردبینی لە بەرنامەی لێخۆشبوونەکان و چاودێری وردی باجەکان.

- لە دوو مانگی ساڵی 2025دا داهاتمان 400 مليار ديناری تێپەڕاندووە.

"لەڕێگەی باشتر کۆنتڕۆڵکردنی دەروازەکان و بۆ زیادکردنی داهاتەکانی دەوڵەت، هەوڵی دوو بەرامبەرکردنی ئەو داهاتە دەدەین".