سەرۆککۆمار واژۆ لەسەر بەپارێزگابوونی هەڵەبجە دەکات

ئاڤا نیوز

 

بڕیارە پێش نیوەڕۆی ئەمڕۆ سەرۆککۆماری عێراق واژۆ لەسەر یاسای بە پارێزگابوونی هەڵەبجە بکات و دواتر لە ڕۆژنامەی "وەقایعی عێراق"ـی بڵاودەکرێتەوە.

 

زانیاریی بەدەستهاتوو: سەرچاوەیەک لە سەرۆکایەتیی کۆمار بە دەروون مەلا ناجی پەیامنێری ئاڤای وتووە، پێش نیوەڕۆی ئەمڕۆ سەرۆکایەتیی کۆمار واژۆ لەسەر ئەو یاسایە دەکات کە ڕۆژی یەکشەممە، لە پەرلەمانی عێراقییەوە بۆ سەرۆکایەتیی کۆمار هاتووە، ئەویش یاسای بەپارێزگابوونی هەڵەبجەیە.

 

لەلایەکی دیکەوە: پێشووتر شاخەوان عەبدوڵڵا، جێگری سەرۆک پەرلەمانی عێراق ڕایگەیاندبوو، دوای واژۆکردنی یاساکە لەلایەن سەرۆکایەتیی کۆمار، لە ماوەی دوو هەفتەدا یاساکە لە "وەقایعی عێراقی" بڵاودەکرێتەوە و دەچێتە بواری جێبەجێکردن.

 

ئەوەی پێویستە بیزانیت: حکومەتی هەرێمی کوردستان ساڵی 2013 ڕەشنووسی بەپارێزگابوونی هەڵەبجەی ڕادەستی نوری مالیکی، سەرۆکی ئەوکاتی حکومەتی عێراق کرد. دواتر لە 13ـی ئاداری 2014 حکومەتی هەرێمی کوردستان بڕیاری بەپارێزگابوونی هەڵەبجەی دەرکرد. ڕۆژی 14ـی نیسان 2025  پەرلەمانی عێراق دەنگیدا لەسەر پڕۆژە یاسای بەپارێزگابوونی هەڵەبجە، بەمەش هەڵەبجە بوو بە نۆزدەهەمین پارێزگای عێراق.