دانوستانەکانی پێکهێنانی حکومەتی خۆجێیی کەرکووک ڕاگیراون

ئاڤا نیوز

 کۆبوونەوەی سێیەمی حیزب و لایەنە براوەکانی کەرکووک لەگەڵ محەمەد شیاع سوودانی، سەرۆکوەزیرانی عێراق،  بۆ کاتێکی نادیار دواخراوە.

بۆچی گرنگە: لە کۆبوونەوەی نێوان لایەنە براوەکانی هەڵبژاردن لە کەرکووک لەگەڵ سوودانی دیدگای دەستپێشخەریی نیشتمانی بۆ پێکهێنانی حکومەتی خۆجێی لە پارێزگای کەرکووک خرایەڕوو کە هەنگاوێکی گرنگە بۆ پارێزگاکە.

لێدوانی فەرمی: حەسەن مەجید، سەرۆکی لیستی پارتی لە ئەنجوومەنی پارێزگای کەرکووک بۆ ئاڤا نیوز گوتی: تا ئێستا گفتوگۆکان لەنێو پێکهاتەکان بەردەوامە، بەڵام کۆبوونەوەی هەموو حیزبەکانی کەرکووک لەگەڵ سوودانی کە بڕیاربوو لەدوای دوو هەفتە لە کۆبوونەوەی دووەم بكرێت نەکرا و بۆ کاتێکی نادیار دواخراوە.

لەلایەکی دیکەوە: ئەحمەد ڕەمزی، ئەندامی ئەنجوومەنی پارێزگای کەرکووک ڕایگەیاند: دوای دوو مانگ لە پەسەندکردنی ئەنجامی هەڵبژاردنی ئەنجوومەنی پارێزگاکان و هەوڵەکانی سەرۆکوەزیران بۆ نزیککردنەوەی بۆچوونی لایەنە سیاسییەکان، بەڵام هیچ بەرەو پێشچوونێک بۆ پێکهێنانی حکومەتی خۆجێی کەرکووک بەدەست نەهاتووە.

باكگراوند: لە 18-12-2023 هەڵبژاردنی ئەنجوومەنی پارێزگاكان لە 15 ی پارێزگای عێراق بە كەركووكیشەوە بەڕێوەچوو، كورد لەو پارێزگایە هەشت كورسی بەدەستهێنا.