"شادوبوم" شوێنەوارێکی گەشتیاریی بێ گەشتیار

ئاڤا نیوز

سەرەڕای ئەوەی دانیشتوانی ناوچەکە و شوێنەوارناسان بەردەوام بانگەوازی بۆ دەکەن بەڵام یەکێک لە کۆنترین و گرنگترین شوێنەوارەکانی بەغدا فەرامۆش کراوە و ئەگەری لەناوچوونی هەیە.

چیرۆکی سەرەکی: شوێنەواری شادوبوم، کە ئێستا بە گردی حەرمەل ناسراوە، لە ڕابردوودا ناوەندێکی دارایی و زانستی بووە، ئەم شوێنەوارە سەدان ساڵ لەمەوبەر سەر بە شانشینی ئێشنۆنا، یەکێک لە دێرینترین شانشینەکانی سۆمەریی بووە.

لێدوانی فەرمی: ئەحمەد حەسەن، چالاکوانی مەدەنی عێراقی، ڕایگەیاند:  شوێنەواری شادوبوم بەتەواوی فەرامۆش و پشتگوێخراوە، بەتایبەتی لەلایەن وەزارەتی ڕۆشنبیریی عێراقەوە و سەرەڕای داواکاریی بەردەوامی پسپۆران و خەڵکی ناوچەکە بۆ نۆژەنکردنەوەی بەڵام هیچ لایەنێکی فەرمی تاوەکو ئیستا وەڵامی بانگەوازەکانی نەداوەتەوە.

زانیاریی زیاتر: حەسەن ئاماژەی بەوەش کرد،  ئەم شوێنەوارە بەهایەکی زانستی و گەشتیاریی گەورەی هەیە و داهاتێکی زۆری دەبێت ئەگەر گرنگی پێبدریت، بەڵام وا پشتگوێ خراوە ماوەی زیاتر لە دوو ساڵە هیچ گەشتیارێک سەردانی نەکردووە.

ئەوەی پێویستە بیزانیت: گرنگیی ئەم  شوێنەوارە لەوەدایە، کۆپییەکی یاسای ئێشنۆنا کە مێژووەکەی دەگەڕێتەوە بۆ سەرەتای سەردەمی بابلیی کۆن، لەساڵانی نێوان 1850-1900 پێش زایینی دۆزرایەوە، هەروەها تەها باقر، شوێنەوارناسی عێراقی بەناوبانگ، لە نێوان ساڵانی 1945 بۆ 1963 نزیکەی 2000 تابلێتی قوڕینی لەم شوێنەوارە دۆزییەوە.