دوای هۆشداریی سوودانی؛ بە شێوازی نوێ لە پەروێزخان هێلکە بەقاچاخ دەهێنرێت

ئاڤا نیوز 

 

سەرەڕای هۆشداریی سوودانی بە بەرپرسانی یەکێتیی نیشتمانیی کوردستان، لە دەروازە سنوورییەکانی پارێزگای سلێمانی بەقاچاخهێنانی هێلکە بەردەوامە و ئێستا شێواز و ڕێگەی نوێ بۆ بەقاچاخهێنانیان بەکار دەهێنن. 

 

وێنە گەورەکە: ڕۆژانە لە دەروازە سنوورییەکانی سلێمانی بە شێوەیەکی نایاسایی هێلکە هاوردەی سلێمانی دەکرێت، لەسەر ئەم پرسە محەممەد شیاع سوودانی، سەرۆکوەزیرانی عێراق هۆشداری بە بەرپرسانی یەکێتی دا، بەڵام تاوەکو ئێستاش بەقاچاخهێنانی هێلکە لە پەروێزخان بەردەوامە.

 

زانیاریی تایبەت: کاتژمێر 09:30ـی شەوی ڕابردوو، شەش بارهەڵگر کە شەش هەزار کارتۆن هێلکەیان هەڵگرتبوو، لە پەروێزخانەوە بەقاچاخ هاوردە کراون. 

 

زانیاریی زیاتر: لە ئێران سەرجەم کارتۆنی هێلکەکان بە ساختە دروست دەکرێن و بەناوی جیاواز دیزاین و جوانکارییان بۆ دەکرێت.

 

شێوازی جێبەجێکردنی: لە گۆڕەپانی کەلار کارتۆنی هێلکەکان ڕێک دەخرێن و ئەوانەی مۆریان لەسەر بێت ڕەوانەی کەرکووک دەکرێن، ئەوانەشی مۆریان لەسەر نەبێت، ڕەوانەی مووسڵ دەکرێن و لەوێ ساخ دەکرێنەوە.