پەرلەمانی عێراق بەدواداچوون بۆ دۆخی سنوورەكانی هەرێمی کوردستان دەكات

ئاڤا نیوز  

ئەندامێكی لیژنەی ئاسایش و بەرگریی لە پەرلەمانی عێراق دەڵێت، بەدواداچوون بۆ دۆخی سنوورەكانی هەرێم و جێبەجێكردنی لێكتێگەیشتنە ئەمنییەكانی نێوان عێراق و وڵاتانی دراوسێ دەكەن.

وێنە گەورەكە: عێراق لەگەڵ توركیا و ئێران لێكتێگەیشتنی ئەمنیی هەیە بۆ سنورداكردنی جوڵە و هاتووچۆی پەكەكە و پێشمەرگەی حزبەكانی رۆژهەڵاتی كوردستان.

لێدوانی فەرمی: "بوونی هەموو گرووپێكی چەكداری دژبەری وڵاتانی دراوسێی عێراق بە مەترسی بۆسەر ئاسایش و سەروەری وڵات هەژمار دەكرێت، بۆیەش بەدواداچوون دەكەین بۆ ڕێكارەكانی حكومەتی فیدڕاڵ تایبەت بە جێبەجێكردنی ڕێككەوتن و لێكتێگەیشتنەكان بۆ پاراستنی ئاسایشی سنوورەكان".

محەممەد شەمەری، ئەندامی لیژنەی ئاسایش و بەرگریی لە پەرلەمانی عێراق وای بە ئاڤا نیوز گوت.

چارەسەرەكان: بەوتەی ئەو ئەندامەی لیژنەی ئاسایش و بەرگریی بوونی هێزەكانی پاسەوانی سنوور و زیادكردنی سەربازگەكانیان كاریگەری ئەرێنی هەبووە لەسەر كەمكردنەوەی پێشێلكارییەكانی وڵاتانی دراوسێ، بۆیە داوا لە حكومەتی فیدڕاڵ كراوە بۆ پتەوكردنی سنوورەكان هەماهەنگی باشتر لەگەڵ پێشمەرگە بكات و ئەوانیش لە پاراستنی سنوورەكاندا بەشداربن.