25 هەزار مووچەخۆری دیکە لە ڕێگەی "هەژماری من" مووچە وەردەگرن

ئاڤا نیوز

پڕۆسەی خۆتۆمارکردنی مووچەخۆران بەردەوامە، بۆ مانگی حەوت 100 هەزار مووچەخۆر لە ڕێگەی 'هەژماری من'ـەوە مووچە وەردەگرن.

وێنە گەورەکە: لە ماوەی سێ مانگدا مووچەی 75 هەزار مووچەخۆر خراوەتە سەر هەژماری من و لە ڕێگەی ئامێرەکانی ATM مووچە وەردەگرن، ئامانجەکە ئەوەیە تاوەکو کۆتایی ئەمساڵ مووچەی سەرجەم مووچەخۆرانی کوردستان بەبانکی بکرێت.

لێدوانی فەرمی: تیمی هەژماری من بە ئاڤا نیوزی گوت: "25 هەزار فەرمانبەری دیکە لە ڕێگەی ئامێرەکانی ATM  مووچەی مانگی حەوت وەردەگرن، بەمەش ژمارەی ئەو فەرمانبەرانەی لە ڕێگەی هەژماری من مووچە وەردەگرن دەبن بە 100 هەزار فەرمانبەر".

ئەوەی پێشبینی دەکرێت: بۆ یەکەمجار لە سلێمانی و دهۆک، هێزەکانی پێشمەرگە لەڕێگەی هەژماری منەوە هاوکاریی هاوپەیمانیان وەرگرت، چاوەڕواندەکرێت فەرمانبەرانیش بەهەمانشێوە لە ڕێگەی ئامێرەکانی ATM لەو دوو پارێزگایە مووچە وەربگرن.