پەیوەندییەکی تەلەفۆنی گەورەترین فەرماندەی حیزبوڵڵای بەرەو مەرگ برد

ئاڤا نیوز

 

ڕۆژنامەی ووڵ ستریت جۆرناڵی ئەمریکی زانیاریی نوێ دەربارەی چۆنیەتی کوشتنی فوئاد شوکر، کەسی دووەمی حیزبوڵڵا ئاشکرا دەکات و دەڵێت، یەک پەیوەندی تەلەفۆنی ناوبراوی بەرەو مەرگ برد.

 

وێنە گەورەكە: دەزگای هەواڵگری لوبنان و ئێران بەردەوامن لە لێكۆڵینەوە لە چۆنیەتی كوشتنی فوئاد شوكر، کەسی دووەمی حیزبوڵڵا کە 30-7-2024 لەلایەن ئیسرائیلەوە کوژرا. گومان لەوە دەكرێت دەزگای هەواڵگری مۆسادی ئیسرائیل دزەی کردبێتە نێو دەزگا و سیستمی هەواڵگریی لوبنان و حیزبوڵڵا.

 

ئەوەی پێویستە بیزانیت: فوئاد شوکر لە کۆتا ڕۆژی ژیانیدا، لە ئۆفیسەکەی خۆی بووە لە نهۆمی دووەمی بینایەکی نیشتەجێبوونی بەیروت، کاتژمێر 7ـی ئێوارە کەسێک پەیوەندییەکی تەلەفۆنی بۆ دەکات و پێی دەڵێت:  بچێتە شووقەیەك لە نهۆمی حەوتەمی هەمان باڵەخانە،  کە دوای ماوەیەکی کەم دەچێتە نهۆمی حەوتەم و لەوێ دەکوژرێت، ئەمە قسەی بەرپرسێكی حیزبوڵڵایە بۆ ڕۆژنامەی وۆڵ ستریت جۆرناڵی ئەمریكی.

 

ئەمەش بزانە: بەهۆی تەقینەوەكەوە فواد شوكر و هاوسەرەكەی و دوو ژن و دوو منداڵی كوژران. هەروەها حەفتا كەسیش لە ڕووداوەكەدا بریندار بوون.

 

زانیاری بەدەستهاتوو: وۆڵ ستریت جۆرناڵ نووسیویەتی، فواد پێش چەند كاتژمێرێك لە كوشتنەكەی بە تەلەفۆن لەگەڵ حەسەن نەسروڵڵا، سەرۆكی حیزبوڵڵای لوبنان قسەی كردووە.