نەتەوە یەکگرتووەکان: گۆڕانی کەشوهەوا ژیانی ملیۆنان عێراقی خستووەتە مەترسییەوە

ئاڤا نیوز

نەتەوەیەکگرتووەکان لەبارەی دۆخی ژینگەی عێراق هۆشداریی دەدات و جەخت دەکاتەوە، گۆڕانی کەشوهەوا لە عێراق مەترسییە بۆسەر تەندروستی گشتی و ژیانی ملیۆنان کەسیشی خستووەتە مەترسییەوە.

 

وێنە گەورەکە: لەپاڵ مەترسییەکانی گۆڕانی کەشوهەوا و بەبیابانبوون، عێراق لە کۆبوونەوەی زبڵ و خاشاکیشدا ئاستی ستانداردی تێپەڕاندووە، ساڵانە 11 ملیۆن تۆن زبڵ کۆدەکرێتەوە و بەشێوەیەکی کۆن دەخرێتە ژێر خاک یان دەسووتێنرێت.

 

لێدوانی فەرمی: ئیسحاق زی، جێگری نێردەی گشتیی نەتەوەیەکگرتووەکان لە عێراق، لەمیانەی بەشداریکردنی لە کۆنفرانسی نێودەوڵەتیی گۆڕانی کەشوهەوا و ئاسایشی تەندروستی کە لە بەغدا سازکرا، ڕایگەیاند: گۆڕانی کەشوهەوا لە عێراق تەنیا مەترسی نییە بۆ سەر تەندروستی گشتی، بەڵکو پێچەوانەکردنەوەی دەیان ساڵەی گەشەسەندن و خاوکردنەوەی پێشکەوتنەکانە دەربارەی ئامانجەکانی گەشەپێدانی بەردەوام، ڕووداوە سەختەکانی کەشوهەواش ملیۆنان کەس دەخاتە مەترسییەوە".

 

زانیاریی زیاتر: ئەو بەرپرسەی نەتەوەیەکگرتووەکان جەختی لەسەر پێویستی خێرا کردەوە بۆ چارەسەرکردنی گۆڕانی کەشوهەوا، ئامادەیی نەتەوەیەکگرتووەکانیشی نیشاندا بۆ هاوکاریکردنی عێراق لەپێناو باشترکردنی کەشوهەوادا.