حەسەن نەسروڵڵا لە شوێنێکی نهێنی و بەشێوەیەکی کاتی بەخاکسپێردرا

ئاڤا نیوز

سەرچاوەیەکی نزیک لە حیزبوڵڵای لوبنان ئاشکرایکرد، حەسەن نەسروڵڵا، ئەمینداری گشتیی پێشووی حیزبوڵڵای لوبنان بەشێوەیەکی کاتی و لە شوێنێکی نهێنی بە خاک سپێردرا.

 

لێدوانی فەرمی: سەرچاوەیەکی نزیک لە حیزبوڵڵای لوبنان بە ئاژانسی فرانس پرێسی ڕاگەیاند: نەسروڵڵا بەشێوەیەکی کاتی لە شوێنێکی نهێنیدا بەخاک سپێردرا و چاوەڕێی هەلێکی گونجاو دەکەن، تاوەکو لە ڕێوڕەسمێکی شایستەدا تەرمی ناوبراو بە هەمیشەیی لە شوێنێکی دیکە بە خاک بسپێردرێت.

 

مەترسییە پێشبینیکراوەکان: سەرچاوەکە جەختی لەوەش کردەوە، لەم کاتەدا ئەنجامدانی ڕێوڕەسمی جەماوەری بۆ بەخاک سپاردنی نەسروڵڵا و دانانی پرسە، مەترسی لەسەر ژیانی ئامادەبووان دروست دەکات، ئەمەش بەهۆی ئەوەی ترس هەیە ئیسرائیل گۆڕەکەشی بکاتە ئامانج.

 

باکگراوند: ئێوارەی ڕۆژی هەینی 27-9-2024، سوپای ئێسرائیل لەڕێگەی فڕۆکەوە حەسەن نەسروڵڵا ئەمینداری گشتیی حیزبوڵڵای لەنێو باڵەخانەیەک لە باشووری بەیرووت کوشت.