پلانی نەتانیاهۆ بۆ بەڕێوەبردنی غەززە دوای شەڕ ئاشکرا دەبێت

ئاڤا نیوز

لە ئێستاوە سەرۆکوەزیرانی ئیسرائیل پلانی بۆ بەڕێوەبردنی غەززە بۆ قۆناغی دوای شەڕ داناوە کە وادەکەی دیارنییە کەی کۆتایی دێت، یەکەم هەنگاویش پێکهێنانی کابینەیەکی سەربازیی دەبێت.

زانیارییە بەدەستهاتووەکان: میدیاکانی ئیسرائیل بەشێک لە پلانی نەتانیاهۆیان ئاشکرا کردووە. بەگوێرەی دۆکیۆمێنتەکان پلانی هەیە کابینەیەکی سەربازیی کاتی لە غەززە پێکبهێنێت و دواتریش بەڕێوەبردنی بە فەڵەستینییەکان بسپێرێت. 

زانیاریی زیاتر: ئەو فەڵەستینییانەی لە پۆستەکانی بەڕێوەبردنی غەززە دادەنرێن، نابێت هیچ جۆرە پەیوەندییەکیان بە حەماس یان بەو دەوڵەتانەوە هەبێت کە "سپۆنسەری تیرۆریزم" دەکەن. هاووڵاتیان لە چەک دادەماڵرێن، جگە لە بەشێکی کەمیان نەبێت بۆ مەبەستی ڕێکخستن و سەقامگیری. 

بۆچی گرنگە: لەوەتەی شەڕی ئیسرائیل و حەماس لە مانگی 10ی ساڵی ڕابردوو دەستی پێکردووە، ئەمە یەکەمجارە نەتانیاهۆ قسە لەسەر بەڕێوەبردنی غەززە لە قۆناغی دوای شەڕ دەکات.