پرۆسەی بایۆمەتری بەکوێ گەیشتووە؟ ئاڤا زانیاری نوێ ئاشکرا دەکات

ئاڤا نیوز

 

لە کۆی ملیۆنێک و 114 هەزار مووچەخۆری هەرێمی کوردستان، نزیکەی 15 هەزار کەس ماون بایۆمەتری بکەن و زۆرینەیان خانەنشینی سەربازی و مەدەنین، تەنیا شەش ڕۆژیش لەبەردەمیاندا ماوە بۆ ئەوەی بایۆمەتری و ژمارەی وەزیفی (UPN) تەواو بکەن.

 

وێنە گەورەکە: شەش ڕۆژ واتە تاوەکو 20-11-2024 لەبەردەم مووچەخۆرانی هەرێمی کوردستان ماوە بۆ ئەوەی پڕۆسەی بایۆمەتری و یوپی ئێن تەواو بکەن، ئەوانەی ماون بەشێکی زۆریان خانەنشینانی مەدەنی، سەربازی و مووچەخۆرانی چاودێریی کۆمەڵایەتین.

 

ئەوەی پێویستە بیزانیت: یەکێک لە مەرجەکانی وەزارەتی دارایی عێراق بۆ ناردنی مووچە بوونی بایۆمەتری و ژمارەی وەزیفی (UPN)ـە، ڕۆژانە 150 بۆ 200 کەس بەمەبەستی تەواوکردنی ڕێکارەکانی بایۆمەتری سەردانی بەڕێوەبەرایەتییەکانی خانەنشین و بانکەکان لە هەولێر، سلێمانی، دهۆک و هەڵەبجە دەکەن بۆ تەواوکردنی ڕێکارەکانی بایۆمەتری و دروستکردنی ژمارەی وەزیفی.

 

زانیاریی تایبەت: ئاڤا لە بەڕێوەبەرایەتییەکانی خانەنشینی هەولێر، سلێمانی و دهۆک، وەزارەتی پێشمەرگە و یەکەکانی 80 و 70 بەدواداچوونی کردووە و بۆی دەرکەوتووە نزیکەی 15 هەزار  کەس ماون بایۆمەتری بکەن، 99%ـیان خانەنشینی مەدەنی و سەربازین."