ئوردن گەشتە ئاسمانییەكانی لەگەڵ لوبنان دەستپێدەكاتەوە

ئاڤا نیوز

 

دوای ڕاگەیاندنی ئاگربەستی 60 ڕۆژەی نێوان ئیسرائیل و حیزبوڵڵا، ئوردن وەک یەکەم وڵات گەشتە ئاسمانییەكانی بۆ لوبنان دەستپێدەكاتەوە.

 

وێنە گەورەكە: لەڕۆژی 23ـی ئەیلوولی ئەمساڵەوە، ئیسرائیل هێرشی خۆی بۆ سەر باشووری لوبنان دەستپێكرد. دوای هەوڵ و فشارە ناوچەیی و نێودەوڵەتییەكان، ڕۆژی سێشەممە 2024/11/26، ڕێككەوتنی ئاگربەستی 60 ڕۆژە لەنێوان ئیسرائیل و حیزبوڵڵا كرا و ڕۆژی دواتر ڕاستەوخۆ ئاگربەستەکە کەوتە بواری جێبەجێکردنەوە، بەهۆیەوە دۆخی لوبنان تاڕاددەیەك ئاسایی بووەتەوە.

 

ڕاگەیێنراوی فەرمی: هێڵی ئاسمانی ئوردن 'Royal Jordanian Airlines، لە پێگەی فەرمی خۆی دەستپێكردنەوەی گەشتەکانی بۆ وڵاتی لوبنان ڕاگەیاند.

 

هێڵی ئاسمانی ئوردن ئاماژەی بەوەشكردووە، لە ڕۆژی یەكشەممەوە ڕێككەوتی 2024/12/1، گەشتەكانی بۆ لوبنان دەستپێدەكاتەوە و ڕۆژانە دوو گەشت لەنێوان عەممان و بەیروت ڕێكدەخرێت.