سوپای سووریا: دەستمان بە هێرشی پێچەوانە کردووە

ئاڤا نیوز

 

دوای ئەوەی لەماوەی دوو ڕۆژی ڕابردوودا گرووپە چەکدارییەکانی ئۆپۆزسیۆنی سووریا دەستیان بە هێرشکرد بۆ سەر چەند ناوچەیەکی ئەو وڵاتە و کۆنترۆڵیان کرد، ئێستا سوپای ئەو وڵاتە دەڵێت هێرشی پێچەوانەمان دەستپێکردووە. 

 

وێنە گەورەکە:  دوای کۆنترۆڵکردنی زۆرینەی پارێزگای حەلەب لەلایەن گروپە چەکدارەکانی ئۆپۆزسیۆن و کشانەوەی سوپای سووریا بەبێ بەرگرییەکی ئەوتۆ لە شارەکە، ئێوارەی ڕۆژی ڕابردووش دەنگۆی کشانەوەی سوپای سووریا لە پارێزگای حەماش بڵاوبووەوە.

 

ڕاگەیێنراوی فەرمی: سوپای سووریا لەو بارەیەوە ڕایگەیاند: لە چەندین ناوچەی باکووری رۆژئاوا هێزەکانیان بەرپەرچی هێرشی گرووپە چەکدارەکان دەدەنەوە و لە داهاتووێکی نزیکدا هێرشی پێچەوانە ئەنجامدەدەن و سەرجەم ناوچەکان کۆنترۆڵ دەکەنەوە. 

 

زانیاریی زیاتر: فەرماندەیی گشتیی سوپای سووریا باس لەوەش دەکات، گرووپە چەکدارەکان لە رێگەی سۆشیاڵ میدیاکانیانەوە هەواڵی ناڕاست بڵاودەکەنەوە، ئەوەش وەک جەنگێکی میدیاییەوە دەیانەوێت لەو ڕێگەیەوە ورەی هاووڵاتییان و سوپا بڕوخێنن. 

 

هاوکات داوا لە هاووڵاتییانیش دەکات، گوێ بە هەواڵ و بڵاوکراوەی سۆشیاڵ میدیای گرووپە چەکدارەکان نەدەن. دڵنیاش دەدات کە سوپا بە هێزەوە بە ئەرکی خۆی هەڵدەستێت و بەرگری لە نیشتمان دەکات، دژی هەموو جۆرە تیرۆر و پاڵپشتیکارانی دەوەستێتەوە.