شەڕ گەیشتە گەڕەکەکانی دیمەشق

ئاڤا نیوز

 

چەکدارانی تەحریرولشام بەردەوامن لە پێشڕەوییەکانیان، ئێستا شەڕ گەیشتووەتە گەڕەکەکانی دیمەشق و لە حومسیش بەتەواوەتی نزیکبوونەتەوە لە کۆنترۆڵکردنی شارەکە.

 

وێنە گەورەکە: شەڕ و پێکدادانەکان لە سووریا بەردەوامن، بەتایبەتی لە حومس و دیمەشق، ئێستا هێزەکانی ئۆپۆزیسیۆن تەنیا چەند کیلۆمەترێکیان ماوە بگەنە دەروازەی شاری دیمەشق و هێزێکی زۆریان لە دەوروبەری شارەکە کۆکردوەتەوە.

 

ئەوەی پێویستە بیزانیت: ئێستا هێزەکانی تەحریرولشام ئەم شوێنانەیان لە دیمەشق کۆنترۆلکردووە، ناوچەی داریا کە شەقامی سەرەکی سەورە و معەزەمییە کۆنترۆڵکراوە، هەروەها ناوچەی معەزمییەش بە تەواوەتی کۆنترۆل کراوە.

 

ئەمەش بزانە: هێزەکانی تەحریرولشام تونیویانە 5 کیلۆ مەتر لە سەر ڕێگەی نێودەوڵەتی فرۆکەخانە لە دیمەشقی پایتەخت کۆنترۆڵ بکەن.

 

لەلایەکی دیکەوە: هێزەکانی تەحریرولشام لە حومسیش بەتەواوەتی نزیکبوونەتەوە لە کۆنترۆڵکردنی تەواوەتی حومس، هەروەها زیندانی ناوەندی حومسیان کۆنترۆڵکردووە و کاروانێکی گەورەی سوپاش لە ناوەندی شارەکە کشاونەتەوە. هاوکات ڕێگەی سەرەکی حومس و حەماشیان کۆنترۆڵکردووە و شەڕ لە چەندین ناوچەی دیکە بەردوەوامە.

 

زانیاریی زیاتر: بەپێی زانیارییەکان باس لە هەڵاتنی بەشار ئەسەد، سەرۆکی سووریا دەکرێت و ماڵپەڕی بلۆمبێرگیش ئاماژە بەوە دەکات کە ئەسەد چووبێتە تارانی پایتەختی ئێران، بەڵام بەرپرسانی تاران ڕەتیدەکەنەوە.