شێخ دارا: لە ناوەڕاستی هەفتەی ئایندە باران دەبارێت

ئاڤا نیوز

 

شێخ دارا، پێشکەشکاری کەشوهەوا لە ئاڤا ڕایدەگەیێنێت: سەرەتای هەفتەی ئایندە كەشوهەوای هەرێمی كوردستان و ناوچەكە بە گشتی، بە ساردی و وشكی دەمێنێتەوە و لە ناوەڕاستی هەفتەكەشدا ئەگەری نمەباران و بەرزبوونەوەی پلەكانی گەرما هەیە.

 

وێنە گەورەکە: ماوەی مانگێكە شەپۆلێکی ساردی جەمسەری باکوور، ڕووی لە هەرێمی کوردستان كردووە و تادێت کاریگەرییەکانی زیاتر دەبێت و پلەکانی گەرما بەراورد بە هەمان كاتی ساڵانی ڕابردوو، زیاتر دابەزیون.

 

لێدوانی فەرمی: شێخ دارا، شارەزا و پێشکەشکاری کەشوهەوا، لە گەشتی هەواڵەکانی کاتژمێر 07:00 ڕایگەیاند، "كاریگەریی شەپۆڵی سارد و وشكی جەمسەری باکوور بەسەر ناوچەكە بەردەوام دەبێت و شێ بە ڕێژەیەكی بەرچاو نزم دەبێتەوە، خێرایی باش بۆ 20 كیلۆمەتر لە كاتژمێرێك زیاد دەبێت و مەزەندەی ڕەشەبا لە پارێزگای سلێمانی دەكرێت".

 

زانیاریی زیاتر: پلەكانی گەرما لەنێوان 2 بۆ 8 پلەی سیلیزی دەبێت و لە ناوچە شاخاوییەكانیش دەگاتە خوار سفری سەدی.

 

پێشبینی دەکرێت: بە پێی پێشبینییەکانی شێخ دارا، ئەگەری هەیە لە ناوەڕاستی هەفتەی ئایندە باران ببارێت و كاریگەریی ساردی وشكی جەمسەری باكوور كەمتر ببێتەوە.