بڕیارە پەرلەمانی عێراق دەنگ لەسەر دوو پرۆژەیاسای پەیوەست بە خەڵکی کوردستان بدات

ئاڤا نیوز

 

ئەمرۆ پەرلەمانی عێراق بۆ دەنگدان لەبارەی چوار پرۆژەیاسای گرنگ کۆدەبێتەوە، دوویان پەیوەستن بە خەڵکی کوردستان، یەکێکیان هەموارکردنەوەی بودجە کە پەیوەستە بە هەناردەکردنەوەی نەوتی کوردستان، دووەمیان تایبەتە بە گەڕاندنەوەی زەوی جووتیارانی کورد لە کەرکووک و سنووری ماددەی 140.

 

چیرۆکی سەرەکی: کارنامەی دانیشتنی ئەمڕۆی پەرلەمانی عێراق 10 بڕگە لەخۆ دەگرێت، گرنگترینیان دەنگدانە لەسەر هەریەکە لە یاسای هەمواری بودجە، لەگەڵ یاسای باری کەسێتی، یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە و یاسای لێبووردنی گشتیی.

 

زانیاریی زیاتر: بەگوێرەی هەمواری بڕگەی 'ج' ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش هەناردەی نەوتی هەرێمی کوردستان ڕاستەوخۆ دەستپێدەکاتەوە.

 

 -پرۆژە یاسایەکی دیکەی گرنگ بۆ کورد بریتییە لە دەنگدان لەسەر هەڵوەشاندنەوەی بڕیارەکانی ڕژێمی بەعس. نیو سەدەیە بەهۆی بڕیارێکی ڕژێمی پێشووی عێراق، کە هەوڵێک بوو بۆ سڕینەوەی کورد و  گۆڕینی دیموگرافیای ناوچە کوردستانییەکان، زیاتر لە 300 هەزار دۆنم زەوی جووتیارانی کورد و تورکمان لە کەرکووک و ناوچەکانی دیکە داگیرکراون یان بە بیانووی جیاواز لێیان سەندراوەتەوە.

لێدوانی فەرمی: هەیبەت حەلبووسی، سەرۆکی فراکسیۆنی " تەقەدوم" دەڵێت: دوای ئەوەی سەرۆکایەتی پەرلەمانی عێراق یاسای لێبوردنی گشتی خستە نێو بەرنامەی کاری دانیشتنەکەی ئەمڕۆی پەرلەمانەوە، تەواوی ئەندامانی فراکسیۆنەکەیان بەشداری دەکات.

 

لەلایەکی دیکەوە: پارتەکەی حولبووسی بایکۆت دەشکێنێت و دەگەڕێتەوە نێو هۆڵی پەرلەمان.

 

- پارتی "تەقەدوم" کە محەممەد حەلبووسی سەرۆکی پێشووی پەرلەمانی عێراق سەرۆکایەتی دەکات، لە ئەمڕۆوە بایکۆت دەشکێنن و بەشداری دانیشتنەکانی پەرلەمانی عێراق دەکەن.

 

- پێشتر فراکسیۆنی "تەقەدوم" کە خاوەنی 39 کورسی پەرلەمانە، بڕیاری دابوو بەشداری هیچ کۆبوونەوەیەکی پەرلەمان نەکات و بەردەوام بێت لە بایکۆتکردن تا ئەو کاتەی بڕگەی دەنگدان لەسەر یاسای لێبوردنی گشتی دەخرێتە نێو کارنامەی دانیشتنەکانی پەرلەمانەوە.