بەڕێوەبەری تیکتۆک پێشتر کارمەندی فەیسبووک بووە

ئاڤا نیوز

شۆو زی چێو، بەڕێوەبەری جێبەجێکاری تۆڕی کۆمەڵایەتیی تیکتۆک پێشتر کارمەندی فەیسبووک بووە و لای مارک زوکەربێرک، بەڕێوەبەری جێبەجێکاری فەیسبووک ئیشی کردووە. ئێستاش پلاتفۆڕمەکەی، یەکێکە لە ڕکابەرە سەرەکییەکانی فەیسبووک.

چیرۆکی سەرەکی: چێو خەڵکی سەنگاپورە، بڕوانامەی ئابووری لە زانکۆی لەندەن بەدەست هێناوە و دواتریش لە ئەمریکا لە زانکۆی هارڤارد درێژەی بە خوێندن داوە. لە ماوەی خوێندنی لە هارڤارد، لە وەرزی هاویندا و وەک بەشێک لە خوێندنەکەی چووەتە کۆمپانیای فەیسبووک و لەوێ ڕاهێنانی کردووە و وەک کارمەند کاری کردووە.

زانیاریی زیاتر: چیو لە ئەمریکا، لەندەن، سینگاپور و هۆنگ کۆنگ کاری کردووە و دواجاریش لە پەکینی پایتەختی چین گیرساوەتەوە؛ ساڵی 2015 پەیوەندیی کردووە بە کۆمپانیای 'شیاومی' و دواتر لە ساڵی 2021 چووەتە کۆمپانیای بایت دانس کە خاوەندارێتیی تیکتۆک دەکات، سەرەتا وەک بەڕێوەبەری دارایی و دواتریش سەرەڕای پۆستەکەی لە بایت دانس بووەتە بەڕێوەبەری جێبەجێکاری تیکتۆک، کە ئێستا مانگانە نزیکەی یەک ملیار بەکاربەری چالاکی هەیە و ڕکابەرێکی سەرەکیی فەیسبووکە.