شەمشەمەکوێرە بەناوبانگەکەی سووریا دەستگیرکرا

ئاڤا نیوز

ئاسایشی گشتیی سووریا لە پارێزگای تەرتوس تاوانبارێکی مەترسیداری دەستگیرکرد کە لە سەردەمی حکومڕانی بەشار ئەسەد تاوانی قێزەونی بەرامبەر خەلكی سووریا کردووە.

زانیاریی بەدەستهاتوو: ئاژانسی هەواڵی سووریا ڕایگەیاند:

- ئاسایشی گشتیی سووریا بە هەماهەنگی لەگەڵ دەزگای زانیاری گشتیی سووریا لە پارێزگای تەرتوس تاوانبار موسا ئەحمەد خەلیفەیان دەستگیرکردووە کە بەهۆی تاوانەکانییەوە نازناوی شەمشەمەکوێرەی لێنراوە.

- شەمشەمەکوێرە بەناوبانگەکەی سووریا تاوانی قێزەونی بەرامبەر گەلی سووریا کردووە و لە کاتی دەستگیرکردنی ژمارەیەک چەکیش دەستیان بەسەردا گیراوە.

ئەوەی لەبارەیەوە دەگوترێت: میدیاکانی سووریا دەڵێن، لەسەردەمی ڕژێمی بەشار ئەسەد موسا ئەحمەد سزای خەڵکی داوە، بە زیندوویی ئەندامی جەستەی خەڵکی بە چەقۆ بڕیوە و دەستدرێژی کردووەتە سەر کچ و ژنانی سووریا، هەروەها ڤیدیۆی تۆمارکردوون و تەنانەت جگەرەی بە زمانی ئەو کەسانە کوژاندووەتەوە کە دژی ڕژێمی بەشار ئەسەد بوون.

ئەوەی پێویستە بیزانیت: لە ناوچەکانی سووریا هێزە ئەمنییەکان دەستیان بە ئۆپراسیۆنەکان بۆ دەستگیرکردنی پاشماوەکانی ڕژێمی بەشار ئەسەد کردووە کە دەستیان لە کوشتن و ئەشکەنجەدانی هاوڵاتیانی سووریا هەبووە.