عێراق "بە نووسراو" شایستە داراییەکانی کۆمپانیاکانی نەوت لە کوردستان گەرەنتی دەکات

ئاڤا نیوز

هەوڵەکان بۆ دەستپێکردنەوەی هەناردەی نەوتی کوردستان بەردەوامە و لەو چوارچێوەیەشدا حکومەتی فیدڕاڵ بە نووسراوی فەرمی دڵنیایی بە کۆمپانیاکانی نەوت داوە کە شایستە داراییەکانیان بۆ خەرج دەکات.

وێنە گەورەکە: سەرەڕای هەموارکردنەوەی یاسای بودجەی عێراق و دیاریکردنی 16 دۆلار بۆ کۆمپانیاکان لەبەرامبەر تێچووی دەرهێنانی هەر بەرمیلێکی نەوت، بەڵام تاوەکو ئێستا و بەهۆی تێبینی کۆمپانیا نەوتییەکان، هەناردەی نەوتی هەرێمی کوردستان دەستیپێنەکردووەتەوە.

لێدوانی فەرمی: حەیان عەبدولغەنی، وەزیری نەوتی عێراق لە چوارچێوەی بەشداریکردنی لە دیداری سلێمانی لە زانکۆی ئەمریکی ئاماژەی بەوەکرد، هەرچەندە لە هەمواری یاسای بودجەدا بۆ بەرهەمهێنانی هەر بەرمیلێک نەوتی کوردستان 16 دۆلار دیاریکراوە و یاساکەش بۆ حکومەت پابەندکارە، بەڵام بۆ دڵنیایی زیاتریش بە کۆمپانیاکانی نەوت، وەزیری دارایی فیدڕاڵ نوسراوێکی فەرمی ئاڕاستە کردوون و تیایدا "بەڵێنی" داوە کە شایستە داراییەکانیان خەرج دەکرێت و نافەوتێت.

زانیاریی زیاتر: پەیوەست بەو قەرزانەی کۆمپانیا جیهانییەکانی نەوتیش لە هەرێمی کوردستان داوای دەکەن، وەزیری نەوتی عێراق وتی، بابەتی قەرزەکان لە یاسای بودجەدا نەهاتووە و بۆ ئەو بابەتە دەبێت گفتوگۆی زیاتر بکرێت، دواتریش دەبێت یاسای بودجە هەموار بکرێتەوە، ئەو کاتە دەتوانن قسە لەسەر دانەوەی قەرزی کۆمپانیا نەوتییەکان بکەن.