ئاڤا بەدواداچوون بۆ مووچەی گرێبەستەکانی ساڵی 2024 دەکات

ئاڤا نیوز

تاوەکو ئێستا مووچەی بەشێک لە گرێبەستەکان نەبەستراوە، سەرچاوەیەک لە وەزارەتی دارایی و ئابووریش دەڵێت، 'داواکارییەک لەمبارەیەوە ئاراستەی ئەنجوومەنی وەزیران دەکەین بۆ ئەوەی بڕیاری لەبارەوە بدرێت'. 

 

بابەتی سەرەکی: ئەو فەرمانبەرانەی لە مانگی 7ی ساڵی 2024 بە گرێبەست لەسەر وەزارەتی کار و کاروباری کۆمەڵایەتی و فەرمانگەکانی دیکەی حکومەتی هەرێمی کوردستان دامەزراون، تاوەکو ئێستا مووچەیان بۆ نەبەستراوە، لە ڕێگەی ئاڤاوە داوایان کرد کە بەدواداچوون بۆ هۆکاری خەرجنەکردن و نەبەستنی مووچەکانیان بکرێت.

 

لێدوانی فەرمییەکان: ئاریان ئەحمەد، وتەبێژی وەزارەتی کار و کاروباری کۆمەڵایەتی بە ئاڤا میدیای ڕاگەیاند: ئێمە هەموو ڕێکارەکانمان تەواو کردووە و ئێستا کارەکە لای وەزارەتی داراییە و ئەوان دەبێت بڕیاری خەرجکردنی مووچەی ئەو گرێبەستانە بدەن.

 

زانیاریی تایبەت: سەرچاوەیەک لە وەزارەتی دارایی و ئابووری حکومەتی هەرێمی کوردستان، بە ئاڤا میدیای ڕاگەیاند: ئێمە ناتوانین بڕیار لەسەر بەستنی مووچەکانیان بدەین، بەڵکو دەبێت داواکارییەک ئاڕاستەی ئەنجوومەنی وەزیران بکەین.

 

- سەرچاوەکەی وەزارەتی دارایی و ئابووری وتیشی: ئێستا ژمێریاری وەزارەت سەرقاڵی ئامادەکردنی وردەکارییەکان بۆ ئەو مەبەستە، چونکە لە داواکارییەکەدا دەبێت ژمارەی گرێبەستەکان، بڕی ئەو پارەیەی وەک مووچە بۆیان تەرخان بکرێت. 

- هەروەها چەند مانگە بێ مووچە دەوامیان کردووە، پێویستە هەمووی بنووسین و بیخەینە بەردەستی ئەنجوومەنی وەزیران بۆ ئەوەی لە کۆبوونەوەدا بڕیاری لەسەر بدرێت.