وەزیری بەرگریی پاکستان: پلانمان نییە بۆ دەستپێکردنی شەڕ لەگەڵ هیندستان

ئاڤا نیوز

 

وەزیری بەرگریی پاکستان دەڵێت، پلانیان نییە هیچ ئۆپەراسیۆنێکی سەربازی دژی هیندستان دەستپێبکەن، ئەمەش وەک "هەنگاوێک بۆ کەمکردنەوەی گژییەکان".

 

وێنە گەورەکە: سێشەممەی ڕابردوو 2025-04-22، لە هێرشی گرووپێکی چەکداریدا بۆ سەر هەرێمی کشمیر لە خاکی هیندستان 26 کەس کوژران، ئەم ڕووداوە جارێکی دیکە ناکۆکی لەمێژینەی نێوان پاکستان و هیندستانی زیندوو کردەوە و هەردوو دەوڵەت هەموو پەیوەندییە دیپلۆماسییەکانیان پچڕاند.

 

ڕاگەیێنراوی فەرمی: خواجە ئاسف، وەزیری بەرگریی پاکستان ڕایگەیاند: "هیچ کاتێک دەستپیشخەری شەڕ ناکەین و هیچ پلانێکمان نییە، بەڵام هەر جوڵەیەک لەلایەن هیندستانەوە هەبێت، کاردانەوەی خۆمان دەبێت".

 

زانیاریی زیاتر: ئاسف گوتیشی،  ئەگەر هیندستان هەوڵی داگیرکردنی پاکستان یان هێرشکردنە سەر پاکستان بدات، ئەوا ڕووبەڕووی وەڵامێکی توند دەبێتەوە".

 

لەلایەکی دیکە: لە بەرامبەردا ئەنجوومەنی ئاسایشی نیشتمانیی پاکستان ڕایگەیاند، هەموو ئاڵوگۆڕێکی بازرگانی لەگەڵ هیندستان ڕادەگرێت و ئاسمانی وڵاتەکەی بەڕووی هێڵە ئاسمانییەکانی هیندستاندا دادەخات.